A USC busca estratexias de nutrición para previr a diabetes

Co obxectivo de predecir o desenvolvemento da diabetes e avaliar a súa relación coa inxesta alimentaria, a Universidade de Santiago participa no proxecto Glucotypes, financiado polo European Innovation Council (EIC), que explora como os patróns individuais da resposta glicémica poden ofrecer información temperá sobre o desenvolvemento da diabetes tipo 2. A través da identificación destes patróns mediante monitorización continua da glicosa e combinando estes datos con información procedente da inxesta dietética, o equipo investigador quere abrir camiño cara a estratexias de nutrición de precisión que permitan previr e xestionar a enfermidade de forma máis eficaz. O consorcio reuniuse en Santiago neste mes de novembro para revisar os avances conseguidos e planificar os seguintes pasos desta iniciativa innovadora.

O grupo de Medicina Interna (MEDINT) e o grupo de Bioestatística e Ciencia de Datos Biomédicos (GRID-BDS), os dous da USC, e en colaboración co grupo Research Methods do IDIS, integran este equipo interdisciplinario de especialistas xunto coa Maastricht University, o Weizmann Institute, Leiden University Medical Center, University of Copenhagen, ILSI Europe e Genos Ltd.

A Universidade de Santiago desempeña un papel fundamental no proxecto, a través do grupo de traballo encargado da análise dos perfís de glicosa mediante monitorización continua. Nesta tarefa participa persoal docente e investigador das áreas de Enfermaría e Medicina da USC, entre os que se atopan os profesores Marcos Pazos Couselo e Francisco Gude, en colaboración coa investigadora Manuela Alonso Sampedro, do Instituto de Investigación Sanitaria de Santiago achegando unha ampla experiencia en investigación clínica e metodolóxica en monitorización continua de glicosa. 

Actualizacións sobre os estudos en marcha

Durante a reunión, que se prolongou durante dous días, os participantes compartiron actualizacións sobre os estudos en marcha, a análise de datos e o desenvolvemento tecnolóxico, ademais de debater sobre os próximos fitos de investigación. O ambiente colaborativo reforzou o obxectivo común do consorcio: ofrecer coñecemento científico que contribúa a vidas máis saudables a través dunha mellor prevención e xestión da diabetes tipo 2.