As asociacións veciñais de Santiago piden máis vixilancia policial nos colexios para evitar o consumo de drogas

A Coordinadora das Asociacións Veciñais de Santiago solicitou onte ao Concello que reforce a presenza policial nas inmediacións dos centros de ensino para previr o consumo de drogas entre os escolares e «disuadir a presenza de pequenos traficantes na contorna dos colexios». Foi un dos principais asuntos que se trataron na última xuntanza do colectivo, celebrada na Casa das Asociacións de Cornes e na que tamén pediron medidas para a mellora da seguridade viaria.

No ámbito dos servizos públicos, decidiron solicitar informes a Raxoi sobre a situación do suministro de auga ou do transporte público, «á vista dos retrasos e problemas que se están dando». Algo semellante perciben na municipalización do aparcadoiro da Praza de Galicia, onde «nada se ten avanzado» desde a creación dunha comisión en febreiro.

Taxa do lixo

Ademais, reiteraron a oposición das asociacións ao criterio de vinculación da taxa do lixo co valor catastral das vivendas no caso da tarifa doméstica, porque «nada ten que ver o valor catastral co lixo xerado», así como a necesidade de que na hostalaría se compute a superficie das terrazas, e a asimilación a categoría de restaurantes a todos aqueles bares que dean comidas.

En canto á participación cidadá, acordaron solicitar á alcaldesa a convocatoria da reunión correspondente ao segundo semestre do ano 2025 do Consello de Relacións Veciñais, así como a modificación do regulamento de participación veciñal.