Os edís do PSOE de Santiago aféanlle ao PP o bloqueo do pago de facturas

Os edís socialistas no Pazo de Raxoi criticaron este sábado a decisión do PP local de votar en contra da autorización para abonar facturas correspondentes a servizos xa prestados ao Concello. Para o PSdeG, «o rexeitamento bloquea de novo a tramitación destes pagamentos, o que afecta tanto ás empresas coma á prestación ordinaria dos servizos municipais».

O voceiro socialista, Sindo Guinarte, lamentou que a situación se repita e advertiu de que esta actitude prexudica directamente á cidadanía. «No pleno deste xoves, unha vez máis, o PP impediu co seu voto en contra que se paguen as facturas, xa non é a primeira vez que acontece isto e que denunciamos que non se poden tomar os cidadáns coma reféns, utilizalos en contra das políticas do goberno local. Os servizos que se prestaron, hai que pagalos», afirmou.