Cátedra Rosalía de Castro: especialistas darán novas pistas sobre a vida da escritora

Seguir ampliando o coñecemento sobre a vida e o contexto cultural de Rosalía de Castro. É o obxectivo dunha xornada da Cátedra Rosalía de Castro da Universidade de Santiago baixo o título de 'Avances na biografía de Rosalía de Castro’, que se desenvolverá o xoves 11 de decembro na Facultade de Filoloxía. A iniciativa reunirá especialistas de referencia no campo dos estudos rosalianos para compartir novas perspectivas biográficas, algunhas delas inéditas.

A xornada será inaugurada ás 9.30 horas polo vicerreitor de Transformación Dixital e Innovación, Gumersindo Feijoo Costa, e polo decano do centro, Elias J. Feijó Torres, acompañados polas persoas responsables da coordinación da Cátedra, Fernando Cabo Aseguinolaza e María do Cebreiro Rábade.

Varios relatorios sobre a figura de Rosalía

O primeiro eixo da xornada estará dedicado aos avances nos estudos biográficos. As intervencións achegarán información relevante sobre cuestións pouco exploradas da vida de Rosalía en Madrid, o seu papel como anfitrioa literaria. Na sesión da mañá Luis Miguel Fernández abrirá o panel co relatorio Rosalía e os Lugín Castro en Madrid. 1856-1858, no que presentará novos datos sobre unha etapa fundamental da vida da escritora. Por outra banda, Xurxo Martínez afondará na historia do mausoleo de Rosalía e Miguel Anxo Seixas analizará o perfil da autora como anfitrioa nunha presentación que incluirá algunha curiosidade sobre receitarios de época.

A sesión de tarde, que comezará ás 16.00 horas, estará integramente dedicada ao Arquivo rosaliano de María Victoria Álvarez Ruiz de Ojeda, custodiado pola Biblioteca da USC tras a doazón formalizada en 2024 por Xesús Alonso Montero, viúvo da investigadora. Este fondo, composto por preto de 500 volumes, cadernos de investigación, materiais inéditos e documentos transcendentais para descifrar a historia vital de Rosalía constitúe un dos recursos documentais máis relevantes para a investigación rosaliana das últimas décadas.

O profesor Xesús Alonso Montero, presentado pola profesora Dolores Vilavedra, ofrecerá a conferencia Informe bibliográfico sobre o Arquivo rosaliano de Victoria Álvarez Ruiz de Ojeda’, na que achegará valiosas orientacións e claves de lectura para futuros estudos baseados neste legado.

Esta xornada insírese na liña de traballo iniciada o pasado mes de abril co primeiro simposio Vida, biografías, bioficcións de Rosalía de Castro. A Cátedra mantén o compromiso de desenvolver de maneira bianual temas estratéxicos arredor da figura e da obra de Rosalía, prioritariamente aqueles relacionados coa súa biografía e cos avances documentais recentes.