O PP acusa a Raxoi de «tomarlle o pelo» aos veciños da Almáciga

O concelleiro do Partido Popular de Santiago, José Ramón de la Fuente, cualificou onte de «tomadura de pelo aos veciños» da Almáciga que o goberno de BNG e CA estableza unha parada de autobús na rúa Touro para resolver a chegada do transporte urbano ao barrio, que hoxe comezará a funcionar a través da liña P1. «Queren colgarse unha medalla sen pensar na veciñanza, nin se esa actuación soluciona realmente os problemas de mobilidade do barrio», subliñou.

O edil explicou que «esta solución foi exposta nunha asemblea celebrada no barrio o pasado mes de marzo e os propios veciños lle deixaron claro ao goberno nacionalista que esa solución non era aceptable, porque non daba solución aos graves problemas de mobilidade e accesibilidade, sobre todo, das persoas de maior idade ou con mobilidade reducida».

O PP propón dúas paradas

Pola contra, De la Fuente destacou que «a única solución aceptable é que o autobús urbano chegue ata o colexio Santiago Apóstolo e faga dúas paradas, unha no mesmo colexio e a outra na rúa Touro; só así se resolverían os problemas de mobilidade na zona e a que está a artellar o goberno de BNG e CA para poñer en práctica a partir desta semana, só ten por obxecto facer propaganda e anuncios baldeiros».

«Para poñer unha liña de autobús que suba só ata a rúa Touro, é mellor que instalen unha rampla mecánica, que daría mellor servizo e menos molestias», remarcou. Ademais, De la Fuente alertou de que a medida supón «a perda de cerca de vinte prazas de aparcamento».