O PSOE de Santiago afea o trato de Raxoi ao club A Gaiola por deixalo sen pavillón: "Provocaron unha situación humillante"

A concelleira do PSOE de Santiago, Marta Abal denunciou onte o «bochorno» vivido o sábado no pavillón de Monte dos Postes, onde estaba prevista a celebración dun partido de fútbol sala feminino da Sociedade Deportiva A Gaiola que non se xogou por estar pechado o recinto. Abal tildou de «inaceptable» a situación e responsabilizou a Raxoi da mesma, xa que «o club contaba con autorización por escrito do concello, pero unha vez máis, a falta de coordinación e o desleixo do goberno local provocaron unha situación humillante».

A representante socialista sinalou que o equipo visitante, o Atlético Arnoia, «tivo que agardar 2 horas fóra ao frío para finalmente ter que volver á casa sen xogar». Abal valorou que «isto non é un erro puntual» senón que «é a segunda vez en catro meses que o concello se esquece de abrir un pavillón para as xogadoras da Gaiola».

Ante esta situación, lamentou que «estamos ante un ninguneo sistemático ao deporte feminino de base» e remarcou que A Gaiola, con 300 licencias e 18 anos de historia, «non merece ser tratado como un estorbo, senón como o referente que é». Así, esixiu que o goberno local «deixe de pedir desculpas baleiras e asuma responsabilidades pola xestión» dos pavillóns. «Santiago non pode permitir que a súa imaxe deportiva quede manchada por unha xestión administrativa tan ineficiente», concluíu».

O Partido Popular pide dimisións inmediatas

O Partido Popular de Santiago, a través do seu concelleiro José Ramón de la Fuente, pediu este luns “responsabilidades claras, inmediatas e contundentes tras a suspensión da competición oficial de fútbol sala feminino no que participa o SD Gaiola, único equipo de fútbol sala feminino de Santiago, o que debería acarear dimisións inmediatas”.

“Non se pode xogar co traballo e as ilusións de xogadoras e afeccionados do SD Gaiola -dixo- e non pase nada, esiximos ao goberno nacionalista que dea explicacións publicamente e anuncie quen vai asumir a responsabilidade polo ocorrido”.

De la Fuente remarcou tamén que “o PP de Santiago reclama ao Concello que asuma as consecuencias que poidan derivarse para o SD Gaiola pola cancelación da xornada, a non haber ninguén para abrir o pavillón; e abone os custos de desprazamento que tiveron que afrontar as xogadoras e equipo técnico do club que veu dende fora de Santiago”.

“Non é ningunha sorpresa a nefasta xestión do goberno de BNG e CA, levamos tempo denunciando a falta de proxecto, ideas e impulso tamén no eido deportivo na cidade, empezando pola falta de instalacións adecuadas e dimensionadas ás necesidades da capital de Galicia, pero o que resulta vergoñento -subliñou- é que se poña de manifesto de forma tan clara e evidente para o resto do deporte galego”.

O edil popular insistiu en que “esperamos que o goberno nacionalista se poña en contacto cos equipos afectados, SD Gaiola, Atlético Arnoia e Rodeiro FSF, porque isto xa non é a primeira vez que ocorre, e lles pida desculpas e asuma as consecuencias que para eles tiveron, polo desleixo deste goberno”.