A oposición tumba a xestión mixta do contrato da auga

A comisión para a xestión do ciclo integral da auga reuniuse este luns con resultado de cambio no modelo proposto polo Bipartito, unha xestión mixta. Na xuntanza deste 2 de febreiro a proposta do goberno local recibiu tan só oito votos a favor (BNG e Compostela Aberta) e 13 en contra (PP e PSdeG).

A proposta dos socialistas, someteuse a votación da comisión da auga o modelo de concesión. Proposta que saiu adiante cunha votación de 13 'Si' (PP e PSdeG) e oito 'Non' do goberno local. Queda agora por determinar cando poderá someterse a pleno este novo modelo, que dende o goberno local cualificou a súa voceira, Míriam Louzao, como "unha mágoa". Neste sentido a portavoz reivindiou unha vez máis que a xestión mixta "garantía un maior control público". 

Nesta mesma liña pronunciouse tamén a voceira da formación socia do goberno bipartito, María Rozas (Compostela Aberta) para asegurar que CA «non apoiará un modelo que non garanta o control público do servizo». Sobre o modelo de concesión polo que aposta a oposición o Pazo de Raxoi, Rozas lamentou que os grupos «non contemplan máis alternativas que a de manter o mesmo modelo privatizado que leva instaurado 50 anos en Santiago e que neste tempo nin garantiu o control do servizo nin permitiu que teñamos unha rede modernizada e infraestruturas en bo estado».

PSOE e non adscritos critican o posicionamento do BNG

Xa antes da xuntanza da comisión da auga o grupo municicipal socialista amosaba a súa oposición á xestión mixta alegando "falta de informes" que a avalasen, asegurando que os informes solicitados non foran facilitados, en referencia á situación económica, técnica e xurídica do Concello de Santiago que xustifique a xestión mixta, que recaería maioritariamente no control municipal. Dende o goberno local, a concelleira Míriam Louzao aseguraba que toda a información requirida polos grupos da oposición fora achegada.

O voceiro socialista situou a postura da súa formación fóra de criterios ideolóxicos e asegurou que «non é unha posición ideolóxica, é unha posición baseada na realidade das circunstancias de Santiago». E matizou estas cuestións de carácter urxente facendo mención a que a cidade «necesita uns cuantiosísimos investimentos a curto prazo en abastecemento, en depósitos, na ETAP para extraer a auga do río Tambre, e eses investimentos non está garantido que poidan chegar pola vía dunha empresa mixta».

Mais as críticas á falta de transparencia e as dúbidas arredor do modelo proposto por Raxoi, que comezaron hai semanas, continuaron na xornada deste luns e acrecentáronse á vista do resultado da votación e o conseguinte cambio de modelo a concesión. No nome dos catro edís non adscritos falou a concelleira Mila Castro, para criticar "a incoherencia do Partido Popular, que bloqueou esta opción en setembro do 2022", –da man de BNG e Compostela, tamén lembraba– sendo ela mesma a concelleira responsable de Servizos Básicos, no mandato anterior, o do socialista Xosé Sánchez Bugallo.

Castro, ao igual que tamén fixo o seu ex compañeiro de bancada e hoxe voceiro socialista, Sindo Guinarte, puxo o foco en que o que este luns saiu adiante foi «a proposta presentada no anterior mandato». «O tempo volve darnos a razón despois de tres anos de roturas», aseguraba Mila Castro.

Pero esta coincidencia en defender o modelo concesional non oculta o enfrontamento permanente entre socialistas e ex socialistas. En documentos aos que puido ter acceso este diario queda reflectida a oposición do grupo municipal socialista á presenza na comisión da auga das concelleiras non adscritas, pese a participaren con voz e sen voto. Opción esta última defendida polo goberno local «dado que os edís non adscritos forman parte do Pleno da Corporación que deberá pronunciarse sobre a proposta da comisión».

As concelleiras non adscritas acusaron a alcaldesa Goretti Sanmartín de "empregar a comisión como cortina de fume para dilatar os prazos e á oposición como escusa para xustificarse ante os seus socios e aplicar o modelo que o BNG aplica alí onde goberna: a concesión".

«O tripartito foi un fraude»

As críticas que chegaron máis alá foron as do Partido Popular. O concelleiro José Antonio Constenla afirmou que o ocorrido na xuntanza da comisión da auga deste luns "deixa en evidencia, unha vez máis, a absoluta falta de cohesión e de proxecto do chamado tripartito municipal", referíndose ao pacto entre BNG, CA e PSdeG que permitiu que Goretti Sanmartín tomase posesión como alcaldesa.

Poñía así Constenla o foco en que o "socio de investidura do BNG", en referencia ao PSOE, "votou en contra deste modelo de contrato". Para o edil popular “o ocorrido confirma que o suposto pacto de perdedores nunca foi real" e engade que "Santiago carece dun goberno sólido e capaz de tomar decisións nos asuntos estratéxicos".

O PP insiste en que o ocorrido é "unha nova proba de que o tripartito foi un fraude desde o primeiro día. Nunca existiu un pacto de goberno nin un proxecto común para Santiago. O que houbo foi un pacto contra Borja Verea que cada día queda máis claro que, en realidade, é un pacto contra Santiago”.

O edil do PP insistiu en que o acontecido coa comisión da auga «confirma o fracaso dun modelo de goberno baseado na improvisación, na confrontación interna e na ausencia total de diálogo». Para os populares, «a desesperación por sobrevivir de Goretti Sanmartín e o goberno de BNG e CA xa se traduce nun balance demoledor para a cidade» e acusan a xestión do bipartito da perda de empresas e na desaparición de comercios na cidade ou na situación na que se atopan os centros socioculturais, que permanecen sen actividade mentres os traballadores teñen aínda nóminas pendentes de cobrar.