Crujeiras retira a Luis Míguez da súa candidatura a reitora da USC

Sete estudantes da USC de diferentes facultades dos campus de Santiago e Lugo que crearon unha conta en Instagram co fin de trasladar á comunidade universitaria información sobre as catro candidatas a reitora durante o periodo electoral pídenlle a Rosa Crujeiras a retirada de Luis Míguez, como secretario xeral, da súa candidatura por difundir discursos de odio nun blog persoal. O entorno da catedrática de Matemáticas, confirmou a EL CORREO na tarde deste martes que "ante as últimas noticias, Luís Míguez, xa non forma parte da candidatura de Rosa Crujeiras". Horas máis tarde, a propia candidata confirmábao no seu Instagram, sinalando que "quen lidera e quen dirixe este programa son eu, como parte dun equipo que quere avanzar cara unha USC feminista, inclusiva e comprometida.

“Non falamos dunha cita illada nin dunha discrepancia ideolóxica puntual, senón dun patrón reiterado de discursos excluíntes, con expresións homófobas, contrarias a dereitos fundamentais e incompatibles cos valores da universidade pública”, inciden nun comunicado en Instagram.

Sinalan que nos seus escritos exprésanse posicións contrarias ao dereito ao aborto, contra a igualdade de xénero, contra a diversidade lingüística e cultural e contra os dereitos das persoas LGTBI.

Así instan a Rosa Crujeiras a  “que deixe constancia de que non comparte estes posicionamentos”.