A CIG levará aos tribunais o convenio de eficacia limitada no transporte

As asembleas do persoal do transporte de persoas por estrada celebradas na noite do luns na Coruña, Compostela e Ferrol aprobaron por unanimidade a proposta da CIG de impugnar na vía xudicial o convenio de eficacia limitada asinado entre a patronal e UGT, "polas múltiples irregularidades cometidas no proceso de mediación", sinala a central nacionalista nun comunicado.

O persoal considera, ao igual que a CIG, que este pacto constitúe "unha fraude" porque se asinou cando a mediación aínda estaba aberta, porque "se vulnerou a liberdade sindical ao non intentar nunca unha negociación coa totalidade da mesa", senón só coa UGT, e porque supón "un ataque directo ás expectativas das traballadoras e traballadores de acadar un convenio digno e estatutario, ao impórselle un texto que foi rexeitado en referendo polo 70% do colectivo en votación".

A CIG ve "mala fe"

Para, Ernesto López Rei, representante da CIG na mesa de negociación, "a mala fe coa que actuaron UGT e a patronal nesta mediación manifesta que para ambas organizacións impor un convenio de eficacia limitada era un fin en si propio e non o resultado da negociación". 

"O normal é intentar unha negociación con toda a mesa e tentar acadar un convenio de eficacia xeral", valora. López Rei incide en que "estamos ante un atentado á liberdade, mais tamén ante unha falta de respecto ao Consello Galego de Relacións Laborais e á súa función mediadora".

Xa preparan as accións xudiciais

A CIG, que acusa de "traizón" a UGT e á patronal de tentar deixalos "á marxe" da negociación, asegura que xa está preparando a impugnación xudicial deste pacto e porá en marcha "todas as accións legais e sindicais precisas para que a negociación do próximo convenio colectivo se desenvolva con todas as garantías, para reverter os recortes, avanzar na mellora das condicións de traballo e conquistar novos dereitos para o sector".