O feminismo compostelán marcha pola «rebelión contra a regresión fascista»

Tres manifestacións conmemoraron este 8M, Día da Muller, en Compostela con cadansúa mobilización reivindicativa, con convocatorias diversas mais co punto coincidente da loita pola igualdade, contra a violencia de xénero, o racismo e a guerra cun berro común: «Rebelión feminista contra a regresión fascista».

Centos e centos de mulleres, homes, persoas transxénero, maiores, novas e cativada marcharon tras as pancartas das organizacións convocantes: a Marcha Mundial das Mulleres (MMM) e a Manifestación Unitaria de organizacións feministas de Compostela, que en ambos casos congregaron diversos colectivos entre os que a chamada ao «antifascismo» era o cartel individual máis común.

Un grito pola igualdade

Ver galería

Na Praza 8 de Marzo a festa comezou xa ás 17 horas con merenda e obradoiros, e ás 20 h. partía a mobilización, baixo o lema: «Pola vida e contra o fascismo: diversidade e feminismo». Moi preto de alí, en Bonaval, a Marcha Mundial convocaba dende as 19 h. para partir tamén ás 20 en dirección a Praterías, baixo o lema «Feminismo é revolución, terra viva, pobos libres, vidas dignas!».

Ao ritmo das consignas e dos tambores de Tamborililás a Virxe da Cerca veu como, pese ás disidencias, o berro era, ademais de alto claro, común:«É necesario saír á rúa. Fronte ao avance que está tendo a ultradereita, temos que facernos visibles, máis que nunca». Falaba así unha das participantes na mobilización, acompañada pola súa nai e a súa filla, tres xeracións de feministas. Coma ela, outra rapaza alertaba na Praza 8 de marzo de que «queren facer que retrocedamos en dereitos, polo que cada manifestación, cada concentración, conta».

Unha causa de todas e todes

Dende o transfeminismo denúnciase transfobia en parte do colectivo, unha das causas que impide unha saída común da mobilización, pese a que o punto final si sexa compartido na Praza de Praterías. Dende o transfeminismo expresouse a EL CORREO GALLEGO a necesidade de «estar aquí, manifestarse nas rúas, ocupar o espazo público e demostrar que o feminismo vale para todas e todes por igual, para xente con capacidades diversas, xente trans, xente non binaria, mulleres racializadas... Debemos estar conxuntamente nos espazos».

Dende a Praza 8 de marzo non se eludiu falar de división, "comeza cando as cousas se repensan, é normal que haxa divisións", explicaba unha participante en conversa con este diario. "As divisións tamén mostran a unión, no fondo o percorrido é común", mais tamén engadían "hai grupos que poden ser excluíntes cara a algunhas cousas, e non estou de acordo, esas exclusións fan difícil unha unión total pero a meta debe ser a mesma: igualdade real entre xénero e clases sociais".

E así foi o 8M compostelán, unha marea feminista que atravesou a Virxe da Cerca contra a guerra, contra o machismo e contra a regresión fascista que pon en perigo os dereitos conquistados.

CIG: ‘mulleres traballadoras’

A mobilización da CIG desmarcouse das outras dúas e centrou a súa manifestación na conciencia de clase, reivindicando «as mulleres traballadoras», poñendo o foco na perspectiva de clase baixo o lema:«Feministas combativas, en loita pola nosa dignidade». O colectivo partiu da estación intermodal e non da Praza Roxa, coma en anos anteriores, e percorreu as rúas dende ás 11.30 horas até a Praza das Praterías. Nesta localización, a intervención final correspondeu á secretaria de Organización, Susana Méndez, que fixo mención no seu discurso a que aínda as mulleres reciben «peores salarios» e tamén unha maior «temporalidade e parcialidade» na xornada laboral fronte ao traballador masculino.