Miguel Ángel Caínzos, profesor emérito da USC, ingresa na Real Academia de Medicina de Galicia

Miguel Ángel Caínzos Fernández, profesor emérito da Universidade de Santiago, acaba de ingresar na Real Academia de Medicina de Galicia como académico numerario de Cirurxía Xeral e do Aparato Dixestivo.

Na cerimonia de ingreso, o pasado venres 6 de marzo, que contou coa asistencia do reitor Antonio López, o profesor Caínzos pronunciou o discurso ‘Avances e problemas da cirurxía xeral e do aparto dixestivo durante os últimos 50 anos’, que foi contestado polo académico numerario territorial po Vigo Pedro Gil Gil. O acto clausurouno o presidente da Academia, Francisco Martelo Villar.

Traxectoria profesional

Caínzos Fernández (A Coruña,1952) estudou Medicina na Universidade de Santiago. Catedrático emérito de Patoloxía e Clínica Cirúrxica, desenvolveu o seu traballo na área de Cirurxía do Departamento de Cirurxía e Especialidades Médico-Cirúrxicas. A súa carreira investigadora transcorreu no grupo ‘Cirurxía experimental. Modelos de Cirurxía experimental’. No seu haber conta, entre outros, con 7 libros, 38 colaboracións noutros volumes, máis de 150 publicacións e máis de 400 comunicacións e relatorios en congresos en diversas citas científicas. Foi director ademais de 12 teses de doutoramento.

É membro de honra de catro sociedades científicas internacionais e entre as súas distincións profesionais máis destacadas figura ter sido o primeiro cirurxán europeo nomeado Felow pola Surgical Infection Society de Norteamérica.