Reabre logo das obras a piscina de Santa Isabel

A alcaldesa de Santiago, Goretti Sanmartín, anunciou en rolda de prensa a conclusión dun dos proxectos herdados do mandato anterior, a reforma do pavillón de Santa Isabel, particularmente as actuacións para remodelar a súa piscina que reabre esta fin de semana logo da reforma que mudou, entre outras cousas, tamén a fachada do pavillón.

A piscina reabre este domingo para un campionato e o vindeiro luns 16 de marzo reabre como era o seu horario para o público xeral: de 7 a 23 horas, de luns a venres; de 9 a 20h. os sábados; e de 9 a 14 horas os domingos.

Zona tensionada

A rexedora fixo referencia na rolda de prensa deste venres á declaración de Compostela zona de mercado residencial tensionado. Unha proposta que se enviou por segunda vez á Xunta «e non unha terceira solicitude», dixo Sanmartín, «como di o PP mentindo coma sempre».

A alcaldesa acusou o edil José Antonio Constenla (PP) de faltar á verdade dicindo que non coñecía a segunda proposta para a declaración de zona tensionada «cando estivo exposta ao público dende o 19 de xaneiro». Sanmartín reafirmou a confianza do Bipartito en que desta volta o goberno autonómico dea o ‘Si’ a unha iniciativa para a que xa deu o visto bo en cidades coma A Coruña.