O estudante gazatí Mahmoud Almughany doutórase na USC

«Podes imaxinar ser un estudante de doutoramento vivindo no medio dunha brutal guerra de exterminio? Tes que traballar, avanzar nos teus estudos, buscar artigos académicos e libros para ler, organizar as túas ideas e escribir, todo mentres careces das necesidades máis básicas. Non hai electricidade, nin auga, nin internet e non hai comida dabondo para sobrevivir nas dificultades da guerra. O ruxido dos avións militares, os bombardeos e as explosións enchen o ar mentres te moves dun lugar a outro, buscando un refuxio seguro para ti e a túa familia».

Así comeza a introdución da tese de doutoramento de Mahmoud Almughany, estudante palestino residente en Gaza que o pasado luns leu a súa tese de doutoramento na Universidade de Santiago de Compostela na que analiza dúas técnicas ortodónticas empregadas para transmitir as forzas xeradas polos fíos e aparellos aos dentes.

Mahmoud Almughany relata na súa tese doutoral as dificultades de atopar unha cafetaría en Gaza «con electricidade e internet» para reunirse cos compañeiros aos que axudaba na investigación. E nesas circunstancias que describe engade, «mergullábame na lectura, a escritura, a análise de datos e os repetidos intentos de redactar un artigo para publicar», un requisito esencial para o doutoramento, «e pedíalles aos participantes no traballo que viñeran aos exames rezando a Deus pola súa seguridade para completar o meu estudo».