Busto valora o plan de Raxoi para que o bus urbano chegue á parroquia: "Pinta ben, pero queda traballo"

A veciñanza de Busto escoitou de primeira man esta semana a proposta do Concello de Santiago para facer chegar o transporte urbano á parroquia unha vez sexa adxudicado o novo contrato, despois de que Goretti Sanmartín se comprometera públicamente a que non quedarían sen servizo pese a que inicialmente lles comunicaran que estaban excluídos. A declaración da alcaldesa, ademais, motivou que aprazaran a solicitude de segregarse de Santiago e unirse a Trazo nunha asemblea.

O pasado luns a alcaldesa e o concelleiro de Obras, Xesús Domínguez, celebraron unha xuntanza coa Asociación de Veciños Campo das Escolas na que lles trasladaron unha proposta de ruta do transporte urbano. O presidente da entidade, José Antonio Montaos, valora que «pinta ben», pero cre que «aínda queda traballo que facer para ter unha ruta en condicións para todos, non únicamente para nós», referíndose tamén a outras parroquias do rural compostelán.

Proposta con «erros»

Montaos explicou que a proposta achegada «non é correcta», xa que «tiña incluso erros na toponimia porque estaba sacada do Google Maps, un traballo deficiente para vir dun técnico». Pese a isto, afirma que «imos confiar» no plan exposto por Raxoi, que implica «definir esa ruta de maneira que cubra a maior cantidade de xente utilizando os menos quilómetros posibles cando saia o contrato».

Desta maneira, a chegada do transporte urbano quedará establecida cando remate o proceso de licitación. O presidente veciñal agarda que non se produzan situacións que poidan demorar o procedemento e insiste en que este voto de confianza «non quita que aínda a día de hoxe non se nos teñan explicado os motivos reais da exclusión da nosa parroquia». Por iso, insiste en solicitar a dimisión do concelleiro de Mobilidade, Xan Duro, e o cese do xerente de Tussa, José Ramón Mosquera.

Outros servizos básicos

Na xuntanza tratáronse outras cuestións básicas de melllora como asfaltados, sinalización ou saneamento de augas, pero Montaos indica que «non hai ningún compromiso concreto de investimentos».