Raxoi estuda recorrer a sentenza que obriga a revisar a saída do interventor municipal

O Concello de Santiago estuda que paso dar tras facerse pública unha sentenza do Tribunal Superior de Xustiza de Galicia (TSXG) que obriga a revisar a denegación dunha prórroga na xubilación para continuar no seu posto ao anterior interventor municipal, unha decisión tomada pola xunta de goberno local no ano 2024. O fallo xudicial ordena retrotraer o procedemento ao momento no que se adoptou esa decisión para que se emita un informe por parte da xefatura de Persoal e unha nova resolución.

Fontes do goberno local sinalan que a sentenza do alto tribunal anula o acordo por un "requisito formal". O TSXG entende que no expediente non figura o informe da área competente na materia, entendendo que esta é a de Persoal, mentres que Raxoi defende que si se cumpriu este trámite, xa que sostén que ese departamento é o de Administración, unha interpretación que compartía o fallo emitido en primeira instancia.

Tras o pronunciamento do TSXG, agora o Concello estuda as posibilidades que ten sobre a mesa: acatar a sentenza e cumprir o "requisito formal" de que se emita un informe por parte da xefatura de Persoal e unha nova resolución ou presentar un recurso de casación ante o Tribunal Supremo. As fontes consultadas puntualizan que "estamos dentro do prazo e os servizos xurídicos están avaliando estas dúas opcións".

Ademais de resolver que se debe devolver o procedemento ao punto no que se descartou a continuidade do interventor, o fallo do alto tribunal galego descarta acordar a prórroga solicitada, así como concederlle unha indemnización, dúas das peticións que formulou o funcionario no seu recurso.

A sentenza "confirma as advertencias do PP"

Sobre o asunto pronunciouse este mércores o concelleiro do Partido Popular de Santiago, José Ramón de la Fuente, que asegurou que a sentenza "confirma plenamente as dúbidas e advertencias que o PP xa expresou no ano 2024 sobre a actuación do goberno de Goretti Sanmartín neste asunto". De la Fuente lembrou que os populares xa denunciaron no seu momento a "gravidade institucional" dunha decisión que consideraban "profundamente política", ao entender que detrás da negativa a permitir a continuidade do interventor podía existir "un intento de apartar unha figura incómoda para Goretti Sanmartín polo exercicio independente das súas funcións de control e fiscalización económica".

"O tempo acabou poñendo as cousas no seu sitio. O que o goberno de BNG e CA intentou presentar como unha decisión puramente organizativa remata agora cunha sentenza do TSXG que anula o procedemento seguido polo Concello por prescindir do procedemento legalmente establecido", afirmou o edil.

"Afecta ás garantías e á transparencia"

O edil subliñou que o alto tribunal "deixa claro que o executivo local adoptou a decisión sen contar cun informe preceptivo da área de Recursos Humanos", un defecto que obriga a retrotraer todo o expediente ao momento da solicitude da prórroga. "Estamos falando da figura encargada do control económico, financeiro e orzamentario do Concello. Non é unha cuestión menor nin un simple trámite administrativo. É unha cuestión que afecta directamente ás garantías, á transparencia e ao correcto funcionamento institucional do Concello de Santiago", sinalou.

Neste sentido, De la Fuente criticou que o goberno de Goretti Sanmartín tratase de xustificar a súa decisión falando da procura dun perfil "máis moderno" ou "máis proclive aos cambios organizativos", asegurando que "o problema nunca foi a modernización nin a dixitalización da administración". "O verdadeiro problema era que existía un interventor que exercía a súa función con independencia, realizando informes e reparos incómodos para o goberno de Goretti Sanmartín. E iso é precisamente o que un goberno democrático debería respectar e protexer, non apartar", asegurou.

O concelleiro engadiu que este caso reflexa unha "crecente politización" da estrutura municipal e reclamou ao goberno local "máxima transparencia" sobre os pasos que vai dar agora o Concello tras o pronunciamento do alto tribunal galego.