Os socialistas denuncian a parálise de Raxoi no tema da vivenda

A edil socialista Marta Abal advertiu este mércores de que os datos publicados polo Colexio Oficial da Arquitectura Técnica da Coruña «son moi preocupantes» e «evidencian un problema estrutural de oferta de vivenda en Santiago», despois de coñecerse que no primeiro trimestre de 2026 só se visaron 18 vivendas novas na cidade, fronte ás 101 do mesmo período do ano 2019.

Abal lembrou que esta caída da construción prodúcese «nun contexto de forte demanda» e puxo o foco nos datos oficiais do Instituto Galego de Vivenda e Solo, que sitúan en 1.813 as persoas inscritas no Rexistro Único de Demandantes de Vivenda para Santiago de Compostela.

A edil tamén lembrou que os datos do Ministerio de Vivenda confirman que Santiago é o segundo municipio de Galicia con máis capacidade residencial pendente de desenvolver, con ámbitos previstos no PXOM aínda sen executar.

«Falta oferta efectiva porque boa parte do solo residencial previsto segue sen desenvolverse». Por iso, desde PSOE insisten na necesidade dunha «planificación estratéxica da vivenda a medio prazo», centrada en desbloquear e desenvolver o solo previsto no PXOM.