Raxoi demanda da concesionaria que retome «xa» as obras en García Lorca

A alcaldesa de Santiago, Goretti Sanmartín, falou en rolda de prensa do parón nos traballos da rúa García Lorca, no barrio da Guadalupe. Segundo os prazos municipais para a «rexeneración desta rúa», debería volverse a traballar o pasado 25 de maio. «A partir dese momento as obras poderían comezar», dixo Sanmartín, algo que non aconteceu, como puido comprobar a dirección facultativa municipal, que o 1 de xuño visitou a zona e constatou que non se retomaron os traballos.

A rexedora insistiu en que os traballos deberan comezar xa, pese a que non se entregou até o de agora máis que o «borrador» do plan de continuidade da obra. Si presentou a concesionaria o plan de seguranza e mais o de residuos, pero Sanmartín asegurou que os traballos poderían retormarse antes de presentar o «documento co plan de obra definitivo».

A obra tivo un incremento de custo de 110.000 euros pola parálise a causa dunha tubaxe de fibrocemento non documentada. Con todo, Sanmartín insta a empresa a retomar «xa» a obra, pide desculpas á veciñanza, asegura que se mantén con ela un contacto estreito e afirma que, de retomárense xa os traballos, «a obra podería entregarse en forma e prazo en abril de 2027».

Dende o Partido Socialista tamén puxeron o foco na demora desta obra, a edil Marta Abal denunciou a situación de abandono que sofre a rúa e acusou ao goberno de manter o barrio «atrapado entre a improvisación e a parálise administrativa, sen ofrecer explicacións nin solucións». Abal lembrou que pasou máis dun mes dende a modificación do proxecto necesaria para continuar os traballos.