O PP reclama unha intervención urxente na contorna do Multiusos Fontes do Sar

José Ramón de la Fuente, concelleiro do Partido Popular de Santiago, denunciou «o preocupante estado de deterioro que presentan os accesos, os aparcadoiros e os espazos exteriores do Multiusos Fontes do Sar, unha das principais infraestruturas deportivas da cidade e punto de encontro diario para miles de deportistas, familias e asistentes a competicións e eventos culturais», sinalou.

«Na actualidade, -agregou De la Fuente- a contorna deste recinto presenta unha imaxe impropia dunha cidade como Santiago, con fochancas de gran tamaño nos viais de acceso e mesmo nos pasos de peóns; acumulacións de auga cada vez que chove, por mor das deficiencias da drenaxe; zonas embarradas polas que deben transitar os peóns; e un aparcadoiro exterior de terra, completamente degradado».

De la Fuente lamentou que «o goberno de BNG e CA leve anos permitindo que unha instalación estratéxica para Santiago se deteriore sen adoptar medidas eficaces, e esta falta de mantemento, non só prexudica a imaxe da cidade, senón que tamén incrementa os riscos para a seguridade de peóns e condutores e dificulta o acceso ás instalacións».

Volta do Obradoiro CAB á Liga ACB

O edil popular pregúntase «se esta é a imaxe que Santiago quere ofrecer coa volta do Obradoiro CAB á Liga ACB». «Nos próximos meses miles de afeccionados, equipos visitantes, patrocinadores e medios de comunicación volverán acudir ao Multiusos Fontes do Sar e o primeiro que atoparán será unha contorna abandonada, deteriorada e moi afastada da imaxe que merece unha cidade referente no deporte, no turismo e na organización de grandes eventos”, sinalou De la Fuente.