O PSOE aposta por unha nova Ordenanza de convivencia para Santiago, unha proposta que levará ao Pleno

O voceiro do PSOE local, Sindo Guinarte, anunciou este luns que levará ao vindeiro pleno unha proposta para que o goberno bipartito impulse "de maneira inmediata a elaboración e aprobación dunha nova Ordenanza de convivencia".

O edil socialista considera que a norma actual, aprobada hai vinte anos, "quedou completamente desfasada" e criticou que o equipo de Goretti Sanmartín siga "sen poñer en marcha un proceso necesario para adaptar a regulación ás necesidades da cidade".

"A cidade necesita unha ordenanza transformadora, moderna e actualizada", explicou Guinarte, para reforzar que é precisa unha adaptación "ás necesidades do Santiago de hoxe e ás novas formas de uso do espazo público". O voceiro lembrou ademais que a normativa vixente "xa non dá resposta aos retos actuais da convivencia".

O portavoz do PSOE advertiu de que "moitas das condutas que afectan á convivencia" están dispersas en distintas ordenanzas municipais, unha situación que, segundo explicou, "xera confusión e dificulta a súa aplicación". Por iso o PSOE defende unha única ordenanza que unifique a regulación existente e que "sexa clara e accesible", que sirva de guía práctica para a cidadanía e para os visitantes, ademais de constituír "unha ferramenta útil para os servizos municipais".

Máis alá da sanción

Sindo Guinarte incidiu na súa intervención en que a nova ordenanza que propoñen dende a bancada socialista "non debe limitarse a un enfoque sancionador". "Non pode concibirse unicamente dende unha perspectiva sancionadora, ten que incorporar unha visión pedagóxica, preventiva e de sensibilización, promovendo o civismo, a corresponsabilidade e a mediación para mellorar a convivencia e previr os conflitos".

Guinarte insistiu en que o goberno local "desbloquee de inmediato" este procedemento e elabore a nova ordenanza cun "verdadeiro diálogo social para acadar o maior consenso posible".