Verea insta ao «desbloqueo» do novo aulario no CEIP Quiroga Palacios

O líder do PP de Santiago, Borja Verea, denunciou este xoves que «15 días despois de coñecérense as condicións do goberno local á Xunta» para a ampliación do CEIP Quiroga Palacios Raxoi segue «sen retirar a chantaxe». Unha «chantaxe» á que facía referencia o conselleiro de Educación, Román Rodríguez, polo condicionante, desmentido dende o Concello, de urbanizar a parcela anexa ao centro a cambio de construír o aulario de infantil.

Verea insistiu en que a Xunta necesita unha parcela de 1.600 metros cadrados para o novo aulario e negou o «malentendido» ao que se refería esta semana a alcaldesa Goretti Sanmartín. «Non hai ningún malentendido. Hai unha condición imposta que pode retirarse inmediatamente». Para o popular «cada día que pasa é un día perdido» para as familias e para a comunidade educativa, polo que reclamou a Sanmartín que «deixe de buscar escusas e solucione un problema que está exclusivamente nas súas mans desbloquear».

Verea foi máis alá, e comprometeuse a resolver a situación se o BNG non desbloquea o proxecto. «Se o BNG non é capaz de facelo agora, farémolo nós en maio», en referencia ás eleccións municipais do próximo ano.