O Concello de Santiago abre a porta ao desbloqueo da ampliación do Quiroga Palacios

A alcaldesa de Santiago pronunciouse este venres arredor da polémica de ampliación do CEIP Quiroga Palacios, na área de Conxo-Santa Marta. A primeiros da semana a Xunta presentou un proxecto básico denunciando «chantaxe» por parte do Concello de Santiago en relación a un condicionante, «desmentido por Raxoi» de ter que urbanizar unha parcela de 14.000 metros cadrados para poder construír o aulario de infantil nunha área de 1.600 metros.

Este xoves o líder da oposición, Borja Verea, tomaba tamén posicionamento asegurando que estaba na man do goberno local «desbloquear a obra» e que de non ser así o resolvería el mesmo «a partir de maio» do ano que vén, é dicir, unha vez que gañe as eleccións municipais, pero tamén lamentaba a demora da resolución da cuestión fronte ás demandas da comunidade educativa.

«Púxenmme en contacto co conselleiro de Educación para intentar conseguir solucionar este problema», afirmaba este venres a alcadesa de Santiago, Goretti Sanmartín, para remarcar que foi Raxoi e non San Caetano quen se puxo en contacto «para ver que se podería facer» e ademais aproveitou para insistir en que «parece estraña a maneira de resolver a situación que ten a Xunta, é normal falar os temas e nós quixémolo en todo momento, tendo en conta o que di a comunidade educativa».

Unha comunidade que leva arredor de dous anos pedindo melloras que esixe a lei, coma un comedor e un ximnasio (na actualidade ocúpase para comedor, precisamente o ximnasio). Goretti Sanmartín insitiu en que dende o Concello de Santiago se agardaba unha actuación máis avariciosa por parte da Xunta, aproveitando a parcela anexa ao centro para facer un bo acceso e resituando o aparcadoiro que existe agora.

«A Xunta opina que non», di Sanmartín, que só quere urbanizar o aulario, «entón fixemos a segregación de maneira áxil, en menos de dous meses dende que se presentou o anteproxecto», para poñer a disposición da Xunta a parcela, mais sempre insistindo na mellora dese acceso que dende a Administración autonómica se considera que xa está cuberto.

Con todo, o avance na polémica parece en que radica entre esta última conversa da alcaldesa Goretti Sanmartín e do conselleiro Román Rodríguez. A rexedora afirmou que se quere desbloquear a cuestión dende o Pazo de Raxoi e que entre ambas as administracións se chegou ao acordo de que os equipos técnicos de ambas as entidades sigan a estudar a mellor solución para unha ampliación que satisfaga a comunidade educativa do CEIP Quiroga Palacios.

Goretti Sanmartín, aproveitou a súa comparecencia deste venres para destacar que «en ningún momento pedimos condicións que se dixo por parte da Xunta», en referencia a esa urbanización dunha parcela de 14.000 metros cadrados. «Temos interese en que se leve a cabo o novo aulario nas mellores condicións posibles», asegurou a rexedora de Compostela, que confía en que «hai posibilidade de acordo sen ninguna dúbida».