Axenda cultural: Que facer hoxe, 24 de agosto, en Santiago?

Aquí recopilamos algúns dos mellores plans para este luns 24 de agosto en Santiago.

As mulleres do blues toman o protagonismo na Casa das Máquinas

DANZA E MÚSICA. O festival C chega cun novo espectáculo á Casa das Máquinas. Laboratorio Escénico presenta Blues de medianoite, unha proposta que combina teatro, música en directo e unha sesión DJ para render homenaxe ás mulleres do blues e á súa contribución á historia deste xénero musical. A primeira parte do espectáculo, a cargo de Alba Fernández, combina danza contemporánea e urbana, transitando entre o formato de escena teatral e o concerto en vivo. A peza entra, a ritmo de blues, no misterio e a sensualidade da noite, achegándonos ás raíces negras no movemento, na música e nos instintos. Tamén se adentra nas imaxes que ofrece o blues e pon en valor a contribución das grandes damas do xénero. A continuación, enmarcada na proposta de Alba Fernández, Jas Processor ofrece unha sesión de DJ centrada nas mulleres artistas e cantantes que deron e dan vida ao blues.Será a partir das 20.00 horas con entrada libre ata completar a capacidade.

‘Cousas do tempo’, un percorrido singular a través dos documentos

EXPOSICIÓN. O Arquivo de Galicia, na Cidade da Cultura, alberga a exposición Cousas do tempo. Documentos dun almanaque imaxinado, unha proposta que convida a mirar o arquivo desde unha perspectiva tan cotiá como sorprendente: o paso do tempo e a vida que se organiza ao seu redor. A mostra recrea a estrutura dos antigos almanaques, publicacións que non só ofrecían prognósticos meteorolóxicos para o ano, senón tamén información variada de interese xeral para a poboación. A partir desta idea, proponse un percorrido singular no que o clima, o calendario e a vida social se entrelazan a través dos documentos. Pode visitarse de balde no horario de apertura do Arquivo.

Misha Bies Golas: últimos 15 días no CGAC

O parque de Galeras acolle ás 11.30h unha nova sesión dos obradoiros de Circonove para rapazada de entre 6 e 14 anos. Poderán mergullarse en técnicas circenses como acrobacias, malabares, equilibrios, danza, clown, teatro, ritmo e creación de xoguetes, sempre adaptadas ao nivel de cada participante. A actividade é de balde con inscrición previa.

Última semana da mostra ‘Gaia Salvaxe’

EXPOSICIÓN. A biblioteca Ánxel Casal acolle ata o 31 de agosto a mostra Gaia Salvaxe, unha colección de acuarelas de Rocío Reboredo que convida o público a mirar un pouco máis de preto e descubrir os fíos invisibles que unen a fauna e a flora galegas. Tamén encara a súa última semana a mostra bibliográfica A miña BD favorita, xurdida dun padlet colaborativo realizado polo Día do cómic. Poden visitarse de balde no horario de apertura da biblioteca.