Novo corte de tráfico en Santiago: afecta á conexión entre dúas céntricas rúas

O Concello de Santiago informou dun novo corte de tráfico para este martes 25 de agosto. A circulación quedará interrompida no carril de saída do paso inferior da rotonda de Rosalía de Castro que une a avenida de Romero Donallo coa avenida do Mestre Mateo desde as 7.30 ata as 9.00 horas, por mor da realización de traballos por parte de Ferrovial.

Obras en Doutor Teixeiro

Ademais, na xornada deste luns xa se poderá circular con normalidade pola rúa Doutor Teixeiro despois de permanecer cortada o xoves e o venres con motivo das obras de asflatado. Aínda que inicialmente estaba previsto manter a rúa cortada este luns para o remate dos traballos, finalmente non foi necesario adoptar esta medida. A actuación acabará ao longo desta semana co pintado do vial para repor a sinaléctica.

Esta intervención sobre a rúa Doutor Teixeiro, xunto coa que se levará a cabo, en próximas datas, na rúa Sempre en Galicia, están financiadas a través do recadado co imposto ás estadías turísticas. Os traballos nestas rúas supoñen un investimento próximo aos 100.000 euros.