Raxoi dá por recuperada a "senda do crecemento" nas estadías turísticas

O Concello de Santiago valora que a cidade consolida a súa demanda turística tras coñecerse o pasado venres os datos recollidos polo Instituto Nacional de Estadística (INE) no mes de xullo. Os hoteis sumaron 156.234 estadías en xullo, un crecemento do 0,62% respecto do mesmo mes do ano pasado. Desde Raxoi estiman que este incremento supón a recuperación da «senda do crecemento» tras varios meses á baixa.

O Concello lembra que a demanda turística da cidade viviu un período complexo debido ao peche da base de Ryanair no Rosalía de Castro a finais de outubro do 2025. Porén, tras a reapertura logo do peche polas obras, apuntan que «grazas ao incremento da conectividade internacional, con novas rutas e compañías, os datos do INE dispoñibles até o momento indican que a demanda, en xeral, está nun periodo de estabilización».

Xogos do Eixo Atlántico

O goberno local destaca o impacto da celebración dos Xogos do Eixo Atlántico entre o 5 e o 10 de xullo, nos que participaron máis de 2.000 deportistas galegos e portugueses. «Este evento atraeu tamén a un número moi relevantes de familiares, que sumaron miles de estadías na cidade neses días», sinala. O financiamento dos xogos a través da taxa turística demostra que «o reinvestimento do recadado contribúe a xerar un modelo turístico máis rendible e sustentable para o conxunto da cidade».

Ademais, estiman que os datos confirman a Compostela como principal destino turístico galego. Fronte ás 156.234 estadías de Santiago, A Coruña tivo 122.337, e Vigo 98.618.