Santiago
+15° C
Actualizado
lunes, 25 octubre 2021
00:59
h

De Santiago ao ceo: lanzan mini-satélites reais desde un dron

Alumnos do IES Pontepedriña participan na competición da Axencia Espacial Europea

Máis de medio cento de estudantes de nove institutos galegos participaron onte na fase galega do certame de proxectos espaciais Cansat, a competición promovida pola Axencia Espacial Europea que na súa posta en marcha en Galicia conta co apoio da Xunta. Os participantes realizaron todas as fases dun proxecto espacial real, desde a elección dos obxectivos da misión ata o deseño do Cansat, un proxecto de simulación real dun satélite do tamaño dunha lata de refrescos do que onte se fixeron os lanzamentos desde o aeródromo de Rozas.

A inauguración da xornada contou coa participación do conselleiro de Cultura, Educación e Universidade, Román Rodríguez, que agradeceu o esforzo de todos os participantes, desde alumnado ata profesorado, “por formar parte unha vez máis deste desafío no que Galicia demostra o interese e as posibilidades da formación en tecnoloxía para as novas xeracións”. Por iso, animou aos participantes a “inspirar a outros moitos compañeiros e centros educativos a achegar a importancia da ciencia como valor educativo e cultural”.

Os alumnos participantes foron os equipos Space G e DPI do IES Pontepedriña de Santiago; MeteoSputnik e Starlinkpvtj do Eusebio da Garda, na Coruña; Le Sat, do IES A Xunqueira I de Pontevedra; PonteSat do Eduardo Pondal de Ponteceso; Planeta RDT do IES Rego da Trabe de Culleredo; SaviSAT do CPI Dr. López Suárez de O Saviñao; BujanSAT do IES David Buján en Cambre; MontecasteloSAT do CPR Las Acacias, en Vigo e Ortisats, do IES Ortigueira.

O desafío para todos eles consistiu en introducir nun espazo reducido os principais subsistemas dun satélite real. Durante a xornada de onte presentaron os seus proxectos e lanzaron desde un dron os CanSat deseñados (do inglés can, lata; e sat, satélite) ata unha altitude aproximada dun quilómetro e, a partir de aí, comezou a misión práctica: conseguir a execución dun experimento científico, logrando unha aterraxe sen danos e a análise de datos recompilados durante o descenso.

Todo o proceso de lanzamento foi gravado e documentado e formará parte dun completo vídeo que poderá visualizarse na vindeira sesión do día 2 de xuño, cando se dará conta do proxecto elixido. A gravación é necesaria para verificar que todos os Cansats participantes descenderon controladamente e tomaron terra con seguridade. Foron xa recuperados para ser entregados de xeito inmediato aos equipos participantes.

FASE NACIONAL. O resultado dos proxectos será avaliado os vindeiros días e o elixido –que representará a Galicia na fase nacional– darase a coñecer na xornada o 2 de xuño. O gañador a nivel nacional poderá participar na competición internacional CanSat 2021 da Axencia Espacial Europea (ESA) a nivel europeo, esta vez de xeito virtual en setembro.

A edición 2021 de CanSat organízase este ano por segunda vez baixo o impulso da Consellería de Educación –coa colaboración específica do departamento Aula Nova do Centro Autonómico de Formación e Innovación de Santiago– e a Vicepresidencia 2ª e a Consellería de Economía, Empresa e Innovación.

27 may 2021 / 01:00
  • Ver comentarios
Noticia marcada para leer más tarde en Tu Correo Gallego
Tema marcado como favorito