As escritoras Berta Dávila e Ledicia Costas, Xerais 2021

A compostelá Berta Dávila venceu en dous dos tres Premios Xerais 2021, ao facerse co galardón en literatura xuvenil con Un elefante na sala de estar e en novela con Os seres queridos. Mentres tanto, a viguesa Ledicia Costas foi premiada en literatura infantil con O neno de lume.

En concreto, e no transcurso dunha gala telemática emitida no mediodía deste sábado, deuse a coñecer que Un elefante na sala de estar, de Berta Dávila, venceu na XIII edición do Premio Jules Verne de Literatura Xuvenil.

Na súa última deliberación, o xurado acordou por unanimidade outorgarlle o galardón a esta obra da que destacou a “sensibilidade” coa que trata o tema do suicidio a través dun “estilo limpo e coidado” que permite “unha lectura amable que engancha desde o primeiro momento”, tal e como informa a editorial organizadora e recolle Europa Press.

Un elefante na sala de estar relata como un grupo de persoas que se ven afectadas por un suicidio tenta buscar o motivo á vez que se culpan e tratan de aceptalo.

A autora constrúe, aínda que sen selo, unha novela coral a través de diferentes voces que participan na reconstrución da historia persoal da protagonista.

Pero Berta Dávila tamén se fixo co Premio Xerais de Novela 2021, na súa XXXVIII edición, grazas a Os seres queridos, que aborda reflexións sobre a alienación e a brecha que a sociedade crea ao “negar á muller como persona desde o momento en que se converte en nai”, explicou ao respecto a organización destas prestixiosas distincións no mundo da literatura.

Trata sobre unha nai que queda embarazada e decide abortar cinco anos despois de ter ao seu primeiro fillo.

Os recordos desta muller, xunto a “abundantes reflexións sobre o proceso creativo literario como unha forma capaz de canalizar os seus pensamentos, entrelázanse cunha narración meticulosa dos acontecementos vitais” que lle ocorren, segundo subliña o xurado.

Dávila, unha vez coñeceu o seu dobre recoñecemento, dixo sentirse “agradecida e afortunada” por estes dous premios: “Porque significan moito para min e porque son o abrigo perfecto para dous libros singulares cos que convivín durante moito tempo de traballo intenso”.

“Só podo darlle as grazas ao xurado do Premio Xerais por escoller como obra gañadora Os seres queridos, un libro duro pero penso que tamén luminoso. E tamén ao xurado do Jules Verne. É realmente emocionante que a miña primeira novela para xente nova reciba este recoñecemento”, manifestou a doblemente galardoada nesta edición.

Pola súa banda, Ledicia Costas alzouse co XXXVI Premio Merlín de Literatura Infantil coa obra O neno de lume, que conta a historia de Morgan, un neno peculiar que apareceu nunha cesta cando era un bebé xunto a unha enigmática nota.

No seu ombreiro sempre leva a Luminaria, unha pequena chama que só el pode ver e coa que pode falar.

Esta obra sorprendeu ao xurado do premio pola súa “eficacia narrativa”, que “lembra á dos contos clásicos”, pola “orixinalidade dos personaxes e pola plasticidade dos escenarios”.

O neno de lume está “salpicada de efectivas doses de humor, tenrura e irreverencia” e mestura a realidade e a fantasía “para falar, sen caer no didactismo e cunha extraordinaria sensibilidade, da busca das orixes, do valor das diferenzas, das inxustizas sociais e do incuestionable poder da amizade”.

Ledicia Costas, tras coñecer o fallo do xurado do galardón literario, lembrou como fai sete anos a súa obra Escarlatina, a cociñeira defunta foi recoñecida precisamente con este mesmo galardón, nun momento no que asegurou que a súa vida “cambiou dun día para outro”.

“Supoño que por iso este premio é tan especial para min. Por todo o que me trouxo”, engadiu a escritora viguesa, á vez que explicou que O neno de lume se asemella aos contos clásicos no feito de que nel se recompila unha “historia de néboa, sopa e nenas e nenos singulares”.

“Creo que isto é o que máis me emociona: que o xurado premie unha historia como esta”, dixo a gañadora do devandito galardón.

As tres obras distinguidas nos Premios Xerais 2021, dotados nesta ocasión cunha contía económica de dez mil euros cada un, está previsto que saian ás librarías no próximo mes de marzo.