Avanza o expediente para declarar Ben de Interese Cultural o Museo Maside
O Goberno galego completou xa a actualización do inventario de toda a colección, composta por máis de dúas mil pezas
O camiño para declarar Ben de Interese Cultural o Museo Carlos Maside de Sada avanza, xa que a Xunta acaba de dar novos pasos no seu expediente neste sentido. Así o confirmou este lunes o secretario xeral de Cultura, Anxo M. Lorenzo, nas xornadas O Museo Carlos Maside: un patrimonio cidadán, nas que fixo balance do traballo do Goberno galego para garantir o futuro deste espazo cultural.
Na súa intervención, declarou que a administración autonómica vén de completar unha actualización do inventario de toda a colección.
“Trátase dunha base de datos realizada polo Servizo de Museos da Xunta na que figuran máis de 2.000 pezas e que nos permite coñecer as intervencións necesarias para frear o deterioro e asegurar a conservación das obras afectadas”, afirmou antes de engadir que actualmente só o sete por cento do total das obras presenta problemas.
“A Xunta de Galicia quere implicarse decididamente no futuro deste museo que documenta unha parte da historia cultural de Galicia”, sostivo o representante autonómico.
Para iso, tal e como avanzou, tamén se traballa en posibles vías de colaboración cos propietarios do edificio, nun estudo sobre os problemas que afectan ao edificio e no deseño dun novo proxecto museográfico que actualice a exposición. “Cremos no alto valor desta institución, e por iso queremos que estea nas condicións óptimas e necesarias para a súa apertura ao público”, concluíu.
Tamén explicou que a administración autonómica está rematando os estudos previos imprescindibles para a tramitación do expediente de declaración BIC.
“Consideramos que se compren os criterios previstos na lexislación de patrimonio cultural para artellar a súa máxima protección, pero debemos contar con un traballo sólido desde o punto de vista histórico-cultural, arquitectónico e museográfico”, afirmou ao respecto.
Unha vez que os informes estean rematados a documentación será enviada aos órganos asesores e consultivos -Consello da Cultura Galega, Real Academia Galega de Belas Artes e Escola Técnica Superior de Arquitectura da Universidade da Coruña- para que valoren a súa importancia para o patrimonio cultural de Galicia.
“É un paso fundamental no proceso de declaración BIC, xa que non se pode continuar coa incoación ata que os órganos asesores emitan o seu informe positivo”, puntualizou.
Concretou a actuación en tres vías: a protección do espazo, a preservación do edificio e da súa colección, e a apertura ao público e os investigadores do centro.
Santiago. O Consello da Cultura Galega organizou e acolleu este luns a primeira das sesións das xornadas tituladas O museo Carlos Maside: un patrimonio cidadán .
“Esta é unha sesión de traballo que esperamos teña os seus froitos para o sistema cultural galego” explicou Rosario Álvarez, presidenta do CCG, na inauguración.
E houbo propostas concretas, como a da avogada especialista en dereito da cultura, Patricia Gabeiras, que apuntou á figura da fundación para a súa futura xestión.
“Ás veces a creación artística e o dereito non concilian moi ben”, apuntou Xavier Ferreira ao respecto.
Felipe Senén asegurou que “estamos nunha cuestión ética e estética que non encaixa ben na xeometría das leis”.
Entre as posibilidades que se abordaron durante as intervencións, plasmouse a da fundación. “As fundacións poden ser as fórmulas xurídicas máis revolucionarias porque fan que os bens non se privaticen xamais”, dixo Gabeira.
Con todo, o máis urxente é a súa protección a través da declaración de BIC.
Os expertos deixaron claro que as dúbidas actuais sobre a titularidade do centro non afectan ao proceso administrativo da súa protección pero si que cómpre definir ben sobre que tipo de protección debería afectar.