'Homeless', obras clave de Ángela de la Cruz no CGAC
Exposición en Santiago cos traballos máis importantes na traxectoria da artista// 25 pezas dos últimos vinte anos
O conselleiro de Cultura, Román Rodríguez, presentou onte a mostra de Ángela de la Cruz que se inaugurou no Centro Galego de Arte Contemporánea (CGAC) e na que se fai un percorrido polos momentos máis importantes na traxectoria da artista.
Ademais do titular de Turismo e da artista, no acto tamén participaron o director xeral de Políticas Culturais, Anxo Lorenzo; o director do centro expositivo, Santiago Olmo, e a comisaria da exposición, Carolina Grau.
O título Homeless fai referencia ao traballo homónimo (Sen fogar, 1996), unha das primeiras obras que realizou a creadora rompendo o bastidor que contén o lenzo para converter en tridimensional a peza plana, borrando os límites entre a pintura e a escultura. Nas súas palabras, "é unha escultura utilizando a linguaxe da pintura e viceversa. É unha pintura e unha escultura".
O nome tamén suxire un tema que segue sendo tan importante hoxe como o foi hai máis de vinte anos e que se vencella coa preocupación de De la Cruz pola actualidade, a desigualdade social, a situación política ou os efectos do cambio climático.
Outra característica da súa creación é a continua reciclaxe que fai dela e que nesta ocasión ten a súa expresión na peza Extensión, na que por unha banda temos a pintura recentemente feita, co seu bastidor intacto e, colgando dela, un vello postizo a modo de extremidade en desuso.
Os 25 traballos que reúne representan momentos clave na súa traxectoria e reflicten o desenvolvemento da súa linguaxe artística nos últimos vinte anos. Para facelo, exponse un percorrido polo que realizou entre os anos 1996 e 2018, creando asociacións con obras das distintas épocas e sen seguir unha orde cronolóxica. Cómpre destacar tamén que a maioría das pezas presentadas non se amosaron de maneira retrospectiva anteriormente.
Deste xeito, durante o percorrido o público poderá apreciar a evolución da linguaxe artística ao observar desde creacións realizadas con diversas porcións de mobiliario, nunha opción de reciclaxe e experimentación con obxectos da súa propia escala, que se incorporan á súa produción desde o ano 2000, como ocorre en Still Life (with Table); ata o último material que a artista inclúe, unha peza de aluminio pintado, Crate (Burgundy) do 2017.