Viernes 18.10.2019 Actualizado 18:56
Google    

El Correo Gallego

Noticia 1 de 1 Tendencias | tendencias@elcorreogallego.es  |   RSS - Tendencias RSS

Nova profundización na táboa periódica dun xeito máis lúdico

A 'Guía dos elementos químicos' explica a súa orixe, a súa historia e o seu comportamento

Maneiro, esda., Freixanes, Bermejo, González Noya e González, na presentación - FOTO: RAG
Maneiro, esda., Freixanes, Bermejo, González Noya e González, na presentación - FOTO: RAG

MARIO ÁLVAREZ SANTIAGO   | 22.01.2019 
A- A+

O elemento químico máis antigo empregado pola humanidade é o ouro. Non se sabe cando se descubriu, pero hai 8.000 anos xa era moi apreciado. Mais é o hidróxeno, o máis lixeiro, abundante do Universo e fonte de todos os outros elementos o que abre a táboa periódica. E tamén a Guía dos elementos químicos. Historia, propiedades e aplicacións, unha obra divulgativa que, de xeito ameno e rigoroso, afonda na orixe e nos nomes das pezas que compoñen esta base sobre a que se constrúe a linguaxe da química.

O volume ve a luz coincidindo coa celebración no 2019 do Ano Internacional do Sistema Periódico, declarado pola ONU para conmemorar os 150 anos da presentación por parte do químico ruso Dimitri Mendeleev, o 6 de marzo de 1869, da súa táboa periódica. Naquela primeira versión constaba de 63 elementos; hoxe son 118 e xa se propuxo o 119.

Manuel Rafael Bermejo Patiño, Ana González Noya e Marcelino Maneiro Maneiro, profesores de química inorgánica da Universidade de Santiago e autores da guía, presentárona onte na Real Academia Galega, acompañados polo presidente, Víctor F. Freixanes, e o académico Manuel González, coordinador científico do Centro Ramón Piñeiro para a Investigación en Humanidades, que edita a obra.

Participaron na revisión lingüística e terminolóxica as investigadoras Tania de Dios Miguéns, Beatriz Fariñas, Belén Poutón e Inés Veiga, un labor realizado desde o Servizo de Terminoloxía Galega que axudará a estandarizar as denominacións dos elementos químicos en galego.

A obra visibiliza ademais voces protagonistas da química, entre elas mulleres de grande importancia na historia do coñecemento.