Santiago
+15° C
Actualizado
jueves, 19 mayo 2022
22:30
h

Encara o sector do turismo un ano moi esperanzado tras as magníficas cifras de 2021

Rueda constata tras a cita de Fitur o grande interese amosado polos visitantes estranxeiros de cara ao segundo ano Xacobeo

O vicepresidente primeiro da Xunta, Alfonso Rueda, destacou as “magníficas cifras” turísticas rexistradas por Galicia durante o pasado exercicio, que permiten “albergar moitísimas esperanzas” para consolidar a recuperación do sector para este segundo ano Xacobeo 2022.

Así o manifestou o tamén conselleiro de Presidencia, Xustiza e Turismo en declaracións aos medios recollidas por Europa Press, tras coñecer os datos de ocupación hostaleira do INE.

De acordo con estas cifras, os hoteis galegos rexistraron o pasado mes de decembro algo máis de 200.000 viaxeiros aloxados e 390.333 noites, unha cifra que triplica o mesmo dato de 2020.

En canto ao acumulado no 2021, as noites hostaleiras foron máis de 6,5 millóns, case un 85 % máis que en 2020, aínda que é un 27,6 % inferior ao 2019, ano prepandemia.

Se se suman os datos de establecementos hostaleiros e extrahoteleros entre xaneiro e novembro -último mes dispoñible-, a Xunta dá a cifra de 4,1 millóns de viaxeiros e case nove millóns de noites, o que sitúa a Galicia “como a segunda comunidade con mellor comportamento hostaleiro con respecto a 2019 en termos relativos, só superada por Asturias.

Para Alfonso Rueda, tendo en conta “as circunstancias” sanitarias do ano pasado, cuns primeiros meses “complicados”, son cifras que demostran que o sector turístico na nosa comunidade “é moi potente e ten unhas perspectivas espectaculares”.

Con estes números, Rueda alberga “moitísimas esperanzas” para o 2022, dado tamén o “éxito” que tivo a caseta de Galicia na Feira Internacional de Turismo (Fitur) de Madrid a semana pasada.

“Se a pandemia respéctanos, que esperemos que si, o ano 2022 en Galicia, co enganche ademais de todo un ano de Xacobeo, vai ser excepcional e podemos volver e mesmo superar as cifras do 2019”, asegurou o vicepresidente primeiro da Xunta.

De feito, destacou que a afluencia de visitantes estivo “bastante repartida” pola comunidade. “O novo turismo vai buscar espazos e destinos que non se buscaban antes da pandemia” e que implicarán “fuxir das masificacións”, tal e como explicou.

Por iso, o “enorme auxe” do turismo nacional o pasado ano non se traduciu, segundo afirmou o vicepresidente, en grandes masificacións que hai en “outros destinos turísticos máis clásicos en España”. “Todo o que é espazo aberto e natureza, en Galicia tivo moitísimo éxito”, engadiu neste sentido.

De cara ao segundo Ano Santo, Rueda constatou que as axencias de viaxe presentes en Fitur destacaban “o interese” do visitante estranxeiro con “reservas potentes a partir do mes de marzo”.

E é que, segundo datos que ofreceu, mentres en 2019 os peregrinos estranxeiros supuñan en torno ao 60 % do total, en 2021 foi “apenas o 10 %”. Por iso, considerou que “hai unha chea de xente doutros países que non veu o ano pasado e que en canto se recupere a mobilidade internacional vai vir” a Compostela.

Achega para A Mariña. A Vicepresidencia primeira e Consellería de Presidencia, Xustiza e Turismo destina un millón de euros ao Plan de Sustentabilidade Turística da Mariña, para modernizar e adaptar este destino nos eixos da sustentabilidade e a dixitalización.

Viajes InterRías certifica en Madrid que a recuperación é imparable
O turoperador confirma o tirón dun catálogo plenamente adaptado á nova situación social

Santiago. A firma galega Viaxes InterRías puido confirmar en Fitur a firmeza da paulatina recuperación do sector turístico, que este ano apoiarase aínda case exclusivamente nun mercado doméstico que mostra plena confianza na adaptación do produto ás novas demandas.

As expectativas do operador na feira víronse plenamente satisfeitas e permitíronlle constatar a determinación do sector por incrementar con rapidez o ritmo de operacións comerciais, tras moitos meses de parálises polo impacto da pandemia ou polo enorme grao de incerteza derivado da mesma.

Viaxes InterRías constatou en Fitur o alto grao de confianza que ofrece ás axencias por calidade, profesionalidade e seguridade para o viaxeiro, e a súa fortaleza fronte a outros operadores turísticos na situación social actual.

Fabián Buezas, director comercial, sostén que “esta edición de Fitur mostrounos a fortaleza do sector en toda a súa dimensión, pola decisión e o convencemento de axencias e operadores para pechar contratacións de maneira inmediata, con produtos totalmente adaptados ao que demanda o cliente final”.

“Notamos -engadiu- que todos os destinos e recursos turísticos que nos visitaron queren formar parte do porfolio de produto de Viaxes InterRías, pois lles transmitimos un importante posicionamento e valor á hora de comercializar nas canles adecuadas e en función do target de cliente”. redacción

Impulsan un innovador proxecto nas explotacións de Valdeorras
A Deputación ourensá e o Clúster da Lousa queren promover as visitas na súa minaría

Santiago. A Deputación de Ourense e o Clúster da Lousa de Galicia promoverán un innovador proxecto de turismo industrial nas explotacións da comarca de Valdeorras, onde a minaría ten unha forte pegada desde hai séculos e supón un sector clave tanto na economía ourensá como na galega.

Así o anunciou o presidente provincial, Manuel Baltar, tralo encontro que mantivo este martes co presidente do Clúster da Lousa, Víctor Cobo, e no que tamén participaron a alcaldesa de Carballeda de Valdeorras, María del Carmen González, e o xerente, Severino González.

A colaboración para desenvolver este proxecto de turismo industrial quedará reflectido nun convenio polo que a Deputación achegará ao clúster unha axuda de 30.000 euros. Ademais, a institución provincial asinará un segundo acordo para cooperar no financiamento das actividades da entidade este ano.

Trala reunión no Pazo Provincial, Manuel Baltar expresou a súa satisfacción por “renovar a estreita colaboración que mantemos co sector da lousa, tan importante para a nosa economía, e nomeadamente nun proxecto turístico no que a provincia ten moito que dicir, en particular no referido ás explotacións mineiras de Valdeorras”.

Baltar avanzou unha próxima visita para profundizar sobre o terreo no potencial da zona en turismo industrial.

En nome do Clúster da Lousa, Víctor Cobo agradeceu a disposición do presidente provincial “a seguir colaborando co sector”, no que insistiu Severino González. ecg

25 ene 2022 / 18:05
  • Ver comentarios
Noticia marcada para leer más tarde en Tu Correo Gallego
TEMAS
Tema marcado como favorito
Selecciona los que más te interesen y verás todas las noticias relacionadas con ellos en Mi Correo Gallego.