O legado de Manuel Moldes será analizado nunha xornada
A cita, este xoves no Consello da Cultura Galega, pode seguirse presencial ou no web
Santiago. Manuel Moldes (Pontevedra, 1949-2017) foi un dos grandes artistas galegos dos séculos XX e XXI, fundador do grupo Atlántica e unha referencia da arte contemporánea galega. Sobre a súa traxectoria artística e persoal afonda a xornada Moldes na memoria, que se desenvolve este xoves no Consello da Cultura Galega (CCG).
A cita, coordinada pola súa viúva e presidenta da Fundación Moldes, Carme Díaz Cacheda, é presencial pero pode seguirse en directo a través do sitio web e as redes sociais da institución.
Foi un artista que produciu obra máis de 50 anos, o que lle permite abranguer todo tipo de temáticas e discursos.
Nesta actividade faranse unha serie de achegamentos á obra de Moldes en distintas épocas da súa pintura e como esta está imbricada co mundo da arte. O poeta e escritor Mariano Hernández de Ossorno vaino situra no contexto artístico dos anos 70.
Luis Francisco Pérez, crítico e teórico da arte contemporánea e comisario de exposicións, ofrecerá un relatorio O sofisticado e cosmopolita expresionismo vernáculo de Manuel Moldes no panorama pictórico español dos 80.
E remata a sesión de relatorios co comisario e crítico de arte Carlos López Bernárdez que afondará na idea da pintura como vivencia. ecg