Actividades de promoción económica para todo Área

A Deputación da Coruña otorgou axudas a entidades sen ánimo de lucro da área de influencia de Compostela para realizar actividades de promoción económica. En total para toda a provincia coruñesa, o ente que preside Valentín González Formoso achega 409.921 euros .

O Boletín Oficial da Provincia (BOP) recollía o pasado 18 de outubro a concesión provisional desta liña de axudas dirixida a colexios profesionais; entidades asociativas e federativas representativas dalgún sector profesional, comercial ou empresarial; cámaras de comercio; e asociacións de veciños e mulleres rurais. Un total de 73 entidades son as beneficiarias destas subvencións, das cales 11 foron concedidas provisionalmente condicionadas.

As achegas oscilan entre un mínimo de 1.770 euros a un máximo de 7.800 euros e permitirán aos beneficiarios e beneficiarias organizar múltiples iniciativas como congresos, exposicións, talleres, cursos de formación, xornadas, estudios e seminarios relacionados coa promoción económica da provincia.

Do mesmo xeito, permitirán cofinanciar iniciativas como festas de interese turístico, feiras de artesanía ou de exaltación de produtos típicos da zona como a trixésimo novena edición da Feira de Artesanía e Alimentación do Couto, a IX Feira dos Oficios da Montaña, Feirauto en Baio, a trixésimo sexta edición Mostra Galega de Apicultura ou VIII Exporpymes, entre outras.

Asemade, tamén se empregarán as axudas para actividades de promoción, difusión e animación do comercio local, decoración de zonas comerciais, publicidade, revistas ou guías, entre outras iniciativas. Segundo indicou o deputado provincial da área de Promoción Económica, Blas García, “con esta importante achega económica queremos dar apoio ao comercio e á hostalaría local, moi afectados pola crise económica derivada da pandemia, así como impulsar o desenvolvemento económico da provincia e fomentar a creación de emprego”.

Así, na comarca de Costa da Morte a Deputación da Coruña otorgou axudas á Asociación de Hostelería de Malpica (7.200 euros), Amigos do Liño (2.553,60), a Casa da Muller de O Couto (4.056 €), o Centro Comercial Aberto de Carballo (7.200), a asociación de comerciantes da Milagrosa (2.965,44 €), o GDR (1.770,71), a Asociación do Automóbil de Baio (2.535) e ó colectivo dos percebeiros da Barca (7.500 euros). Esta última concesión é provisional e está condicionada á rectificación dalgunha información aportada.

Polo que respecta á zona do Barbanza, as achegas da administración provincial repartiranse entre a Asociación Boirense de Empresarios (7.400 euros), a entidade de comerciantes de Ribeira (7.400) e á patronal de Rianxo (7.400 euros). Mentres que na comarca de Muros-Noia recibiron subvencións o colectivo de empresarios de Carnota (3.591,60 euros) e a asociación Noia Histórica (7.400 euros).

En canto á contorna de Santiago, os fondos provinciais recaeron na entidade de comerciantes da Baña (5.128,08 euros), Bertamiráns (5.670), Melide (7.400 €) e Santa Comba (7.300), na Asociación Em-Rede (2.888,97 euros), Gazafellos (3.360), ENE (7.500 €), no colectivo de hostaleiros de Melide (7.500) e na asociación de empresarios de Milladoiro (7.500 euros). As tres últimas están condicionadas.

A maiores, esta liña de axudas tamén benificiará á asociación de axencias de viaxes, AGASOL, a entidade galega de apicultores e dos viveiristas do noroeste, CECAP ou ó colexio de enxeñeiros, entre outros.