Ames plantou máis de tres mil árbores co Plan de Incendios

A finais de novembro de 2021 o Concello de Ames iniciou o proceso de adecuación de 4 hectáreas de terreos en Montemaior e Ventosa para transformalos en faixas secundarias de seguridade contra o lume, e xa no mes de decembro puxo en marcha a plantación de 900 árbores, maioritariamente castiñeiros, cerdeiras e carballos, acompañadas doutras frondosas como bidueiros, noceiras e freixos.

Ditas actuacións estaban previstas inicialmente para o ano 2020, pero a situación epidemiolóxica causada pola covid impediu que se desenvolvesen, e forman parte do plan de continuidade da prevención de incencios mediante a plantación de frondosas caducifolias nas faixas de xestión de biomasa. Este plan, que prevé actuacións entre 2021 e 2024, conta con actuacións previas dende 2016. Precisamente nese ano plantáronse 37 fincas, houbo 33 propietarios implicados, a superficie total foi de 19.374 metros cadrados e plantáronse un total de 815 árbores.

No inverno 2017-2018 foron 76 as fincas plantadas, cunha superficie total de 57.030 metros cadrados e 1.570 árbores: 1.206 castiñeiros, 11 freixos, 67 abeleiras, 82 cerdeiras, 113 pradairos, 36 bidueiros e 9 noceiras. Os ámbitos nos que se levaron a cabo os traballos foron Balindo, Fernande e Vilaverde (ámbito 27), que estaba previsto para 2016 e daba continuidade aos traballos realizados na parroquia de Piñeiro; A Folgueira e Mercuto (ámbito 25) polos incendios forestais reiterados
nese entorno; e Aldea Nova e Os Batáns (ámbito illado 4B) por ser
clasificado como lugar de alto pe-
rigo e que ocorresen varios incendios ao longo dos anos 2015 e 2016.

En 2018 afectaron os cambios producidos na Lei 3/2007, do 9 de abril, de prevención e defensa contra os incendios forestais de Galicia, ampliando considerablemente a superficie nas que realizar a corta de piñeiros, eucaliptos e acacias. Realizáronse actuacións en 34.442 metros cadrados repartidos entre 34 fincas con 238 castiñeiros, 58 carballos, 9 freixos, 23 abeleiras, 41 cerdeiras, 27 pradairos, 97 bidueiros, 12 ameneiros e 9 noceiras; en total 514 árbores. Os ámbitos foron Ventosa, Lombao e Bosque Animado (ámbito 09) e a acotación Monte de Outeiro (ámbito 04A) e Pena Amarela (ámbito 04B).

En canto ao inverno 2019-2020, plantáronse 42.042 metros cadrados de superficie, repartidos en 41 fincas, con 1.076 árbores: 527 castiñeiros, 118 cerdeiras, 154 carballos, 120 abeleiras, 77 noceiras, 40 bidueiros, 10 pradairos, 15 manzanceiras, 15 pereiras. Traballouse novamente en Ventosa, Lombao e Bosque Animado (ámbito 09) con moi bos resultados.

O previsto no plan de inverno 2020-2021, cuxos traballos comezaron finalmente en novembro de 2021 pola situación sanitaria, os ámbitos elixidos foron Montemaior, dando continuidade ás actuación da anualidade precedente; Condomiña, Tarroeira e Punxeiras (ámbito 10), que ten unha perigosidade do 18,10 % e 460 metros cadrados; e Mámoa e Seares Abaixo (ámbito 29), de 1.268 metros cadrados e 17,79 % de perigosidade. En total, son 61 hectáreas, aínda que dese terreo 10,69 hectáreas foron clasificadas de perigorisade moi elevada.

Finalmente, as actuacións correspondentes ao inverno 2021-2022 se levarán a cabo en Condomiña e Tarroeira (ámbito 10), situadas na parroquia de Ortoño. Afectarán a 350 fincas que suman un total de 10 hectáreas, repartidas entre cerca de 160 propietarios. Para adherirse ao plan amesá de prevención de incendios as fincas deben estar rozadas e sen piñeiros, eucaliptos e acacias. Unha vez incorporados no plan, os veciños poderán solicitar unha subvención que cubrirá o 80 % dos traballos de subsolado, plantación e fertilización.