Sesenta anos de milagres en Laxe

Milleiros de persoas presenciaron en Laxe un novo milagre da Virxe do Carme, que coincidiu ademais co sesenta aniversario do tradicional Naufraxio, un simulacro que este ano viviu a súa primeira edición sen o seu creador: Avelino Lema Santos, falecido en setembro de 2020.

Mariñeiro toda a súa vida, Avelino foi quen instaurou en Laxe esta representación, declarada dende hai anos como Festa de Interese Turístico de Galicia, en agradecemento á Virxe do Carme por axudarlle a salvar a súa vida ata en tres ocasións, con motivo dos naufraxios doutros tantos barcos nos que el navegaba como tripulante. Unha posta en escena para a que se inspirou nun acto similar que se celebra nunha vila costeira de Perú, e que hoxe é un referente da vila laxense.

A Confraría de Pescadores de Laxe quixo que esta sesenta edición estivese adicada a Avelino Lema, a quen renderon unha homenaxe durante a misa na honra da Virxe do Carme, na que Antonio Barros intepretou a Salve Mariñeira en memoria de todos os náufragos.

O acto litúrxico deu paso a unha procesión presidida pola imaxe da Virxe ata o porto da vila. Alí, a patroa dos mariñeiros obrou un novo milagre devolvéndolle a vida a un dos náufragos da embarcación que foi a pique na dársena laxense.

Os seus compañeiros lograron chegar a nado a terra e recuperar o cadáver que, tras ser depositado aos pés da Virxe do Carme, recobrou a vida entre aplausos e unha sentida interpretación da Salve Mariñeira por parte dos náufragos e de moitos dos que presenciaron, un ano máis, a acción salvadora.

De seguido, como vén sendo costume, os mariñeiros de Laxe acompañaron á Virxe do Carme nunha procesión por mar, encabezada este ano polo pesqueiro 2ª María Isabel, a bordo do cal viaxaba a imaxe da santa, acompañada polos náufragos e tamén polo alcalde laxense, José Luis Pérez, entre outros.