Recobran vida os camiños da Costa da Morte neste outono

Os camiños e corredoiras da Costa da Morte están a recobrar unha nova vida da man dos centos de sendeiristas que cada fin de semana saen a camiñar para facer deporte, aprender e mesmo solidarizarse, como sucedeu o domingo en Coristanco.

Preto dun cento de persoas, repartidas en grupos de dez, participaron na I Andaina Solidaria organizada polo Concello coristanqués a favor da loita contra o cancro de mama. Foi unha actividade deportiva e saudable que se desenvolveu a carón do río Anllóns. Á comitiva sumouse tamén a presidenta da xuntal local da AECC, María do Carme Facal, e colaboraron coa causa Carrefour (aportando auga e froita para os camiñantes), Autos Facal e Autos Fernández (que puxeron os autobuses para o camiño de volta) e Protección Civil de Coristanco. Dende o Concello queren agradecer o apoio de todos eles.

E na Laracha comezou esta fin de semana o 9º Outono en Marcha de Senda Nova, cunha nova ruta pola Senda das Capelas, que partiu de Montemaior, a carón da igrexa de Santa Margarida. Visitaron tamén as de Nosa Señora de Cumiáns e a de San Roque da Pena, e no seu percorrido topáronse con María, a cesteira de Brumiáns quen, ademais de trenzar o bimbio para facer cestas, tamén é unha boa regueifeira e así llo demostrou aos camiñantes.

Polo camiño fixeron unha parada no curtidoiro de Cumiáns, onde Suso e a súa familia amosaron a súa hospitalidade aos sendeiristas. Este taller funcionaba xa no 1852 e alberga espazos materiais e ferramentas para “a realización dunha visita que, nas verbas de Suso, é totalmente interpretativo”, afirma José Manuel Menéndez, presidente de Senda Nova.

No tramo final da andaina case puideron divisar por completo o percorrido cando transitaban “polas antigas e importantes vías de comunicación situadas nos máis altos montes da parroquia, alá onde os horizontes agasallan a vista coas costas de Ferrol”, engadiu.

A parada no carballo do Outeiro, proposto polo Concello larachés para que sexa recoñecido como árbore senlleira, foi a última antes da chegada á igrexa parroquial. Foi, asegura Menéndez, “unha andaina con tempo, participantes e persoeiros que cultivaron calma e recolleron coñecemento”.

Dende Senda Nova agradecen, coma sempre, a aportación do Concello da Laracha e a labor de Protección Civil de Carballo.

O vindeiro domingo, día 25 de outubro, volverán aos camiños para descubrir os segredos da ruta Razo-Baldaio para protexer, na que conviven ecoloxía e paisaxe. Trátase dun percorrido de 14 quilómetros, ao longo dos cales xeoloxía, cultura e biodiversidade conforman un espazo natural que alberga un dos sistemas dunares mellor conservados de Galicia e unha zona húmida que acolle interesantes especies de avifauna e é berce de luxo para a Píllara das Dunas. Os interesados en participar poden inscribirse ata dous días antes do roteiro.

Pola súa banda, en Zas retomaron o programa de Andainas de Outono cun novo percorrido pola Ruta da Auga, seguindo as novas medidas de prevención do covid-19.

Os participantes dividíronse en dous grupos acompañados de tres guías, que se encargaron de explicar aqueles elementos máis destacados polos que pasa o roteiro de dez quilómetros, no que se poden contemplar fervenzas, muíños, un batán, pontellas, abellarizas e unha rica e variada flora e fauna. Unha ruta que, segundo o Concello de Zas, organizador das andainas, “está en proceso de homologación como sendeiro de pequeno percorrido”.