Repaso ás comedias femininas no sétimo Carballo Interplay

O VII Festival de Contidos Dixitais Carballo Interplay celebrará do 18 ao 21 de novembro unha versión híbrida atendendo ás restriccións sanitarias, e ofrecerá ao vivo e por streaming un completo repaso polas barricadas da comedia feminina, cun menú degustación de shows pensados, dirixidos e protagonizados por mulleres que desenvolveron os seus traballos desde a resistencia e desde internet, en distintos formatos e plataformas.

O público desta sétima edición poderá coñecer de primeira man a proposta cómica da amesá afincada en Madrid, Lorena Iglesias, unha actriz, guionista e youtuber marxinal que participa en programas de radio e colabora en eventos feministas. Desenvolve tamén na Academia de Cinema a serie Milennials mal. Traerá a Carballo o seu Necroshow, un show de humor semanal dunha hora de duración con vídeos, música urbana en vivo, ASMR e stand-up que saca o seu nome dunha frase de Ayuso, presidenta da Comunidade de Madrid, sobre a exhumación de Franco.

Ademais, o Carballo Interplay ofrecerá a oportunidade de participar, ao vivo ou por streaming, no podcast semanal de Carolina Iglesias e Victoria Martín, Estirando el chicle. A primeira é unha guionista, cómica e presentadora coruñesa que se deu a coñecer no Chat de Operación Triunfo e colaborando en Yu (Los 40) e La Hora Youtuber de Vodafone Yu. Coñecida en internet coma Percebesygrelos, hai uns anos visitou o festival para falar da súa canle de Youtube e das súas paixóns: a cultura pop, Galicia e Eurovisión.

Volve á capital de Bergantiños acompañada pola xornalista, guionista e colaboradora de televisión e radio Victoria Martín de la Cova, co-creadora e presentadora da canle de Youtube Living Postureo, e do programa Flooxer, Neox e Europa FM Problemas del Primer Mundo. Tamén colabora en Yu No Te Pierdas Nada e traballou como guionista para La Resistencia, de David Broncano; como colaboradora para Las Que Faltaban, de Movistar+, e participou en diferentes formatos na canle Comedy Central.

Lorena Iglesias, Victoria Martín e Carolina Iglesias ofrecerán os seus shows o venres 20 pola tarde e o sábado 21 pola mañá falarán con Sara García, máis coñecida como PennyJay, sobre por que custa asumir que as mulleres son tan graciosas coma os homes.

O Carballo Interplay completará o seu percorrido pola internet máis feminista, diversa, aberta e disidente dirixindo a súa ollada ao proxecto Radio Primavera Sound e ao seu show Ciberlocutorio, un podcast en directo presentado polas xornalistas Anna Pacheco e Andrea Gumes, que contarán nesta ocasión cun convidado de excepción: Brays Efe.

Tamén estará no Interplay a directora de Radio Primavera Sound, Marta Salicrú, unha xornalista musical con 15 anos de experiencia que participou como relatora en eventos internacionais como Eurosonic Noorderslag (ESNS), Primaver Pro, M for Montreal and MIL ou Lisbon International Music Network, e que en Carballo conversará sobre a importancia de impulsar e manter na rede unha radio feminista, diversa, aberta e disidente.

Por outra banda, Marina Amores, “Blissy”, directora da serie Nerfeadas, e Minia “Samku” Monteagudo, comentarista e divulgadora de eSports, falarán sobre os videoxogos como unha das industrias máis innovadoras pero que, en termos de igualdade, diversidade e inclusión, están moi atrasados con respecto a outras industrial culturais. Explicarán por que sucede isto.