Falece o copiloto despois de saírse de vía en Caldas
Caldas. Este sábado faleceu Rodrigo Rodríguez Ruel, un mozo de 21 anos natural de Portas, cando viaxaba nun turismo como copiloto despois de saírse da vía o automóbil no que circulaba durante a madrugada deste sábado en Caldas de Reis. Ademais, o condutor resultou ferido, Brais T., de consideración e foi trasladado ao centro hospitalario de Montecelo.
Segundo indicaron ao 112 Galicia, os dous ocupantes do coche foron excarcerados polos Bombeiros do Salnés, ao quedar atrapados despois de derrapar e esnafrarse contra o portal da factoría láctea Clesa, barallándose exceso de velocidade en estrada mollada.
O sinistro produciuse no punto quilométrico 228 da N-640, estrada que une Caldas e Vilagarcía, preto das 02.00.
Traballadores do cercano polígono alertaron ao 112 Galicia dos feitos. Acudiron 061, Policía Local, Bombeiros do Salnés, Tráfico, mantemento de estradas e Protección Civil de Caldas de Reis. o. d. vilar