LalínCamp 22 aumenta as prazas ante a gran demanda

Lalín. A oferta de campamentos municipais para este verán LalínCamp2022 vén de arrancar estes días. O edil de Xuventude, Avelino Souto, explica que “o Concello rexistrou moitas solicitudes de inscrición e malia a que sacou o maior número de prazas de campamentos da historia non resultaron abondas para atender á altísima demanda, o que avala a atinada e variada oferta que se propuxo desde o goberno con máis de 300 prazas en dez propostas diferentes para rapaces de 3 a 17 anos”.

“Dada a elevada demanda, desde o goberno incrementamos a oferta en 50 prazas máis, superando as 350, un número récord, para intentar conseguir que tiveran oportunidade o maior número de nenos e nenas posible”, precisa Souto, que remarca tamén que “é o primeiro ano que non se deixa repetir campamento a un mesmo usuario”.

O concelleiro de Xuventude explicou que tamén se produciu un incremento de prazas para os máis pequenos a través do Miúdo Camp. “Actualmente queda unha lista pequena de espera e agardamos que os rapaces que están nela poidan ir entrando de xeito paulatino nalgún dos campamentos, segundo se vaia producindo algunha baixa”, puntualiza. arca