CONCERTO. Ponte Ledesma completou o aforo, que se reduxo a só 230 persoas polas preceptivas medidas sanitarias // Trescentas candeas iluminaron o lugar
Notable éxito da Noite Velada coa música da Banda da Loba
M. Boo
2020/08/0901:00H.
Ata 300 candeas iluminaron Ponte Ledesma para crear un ambiente que só recibiu loubanzas dos asistentes.
Un total de 230 persoas gozaron o venres dunha Noite Velada, atípica, pero moi especial en Ponte Ledesma. A ponte medieval iluminouse novamente con trescentas candeas proporcionando un ambiente único para o concerto de A Banda da Loba.
O Campo do Río acondicionouse de tal xeito que o público se puidese distribuír en cadeiras dispostas coa distancia de seguridade pertinente. Dende os controis de acceso asegurouse que todas as persoas asistentes cumprisen coas preceptivas medidas hixiénico-sanitarias de prevención contra a covid-19.
Esta actividade completou o seu aforo de 230 persoas aos poucos días de abrírense as inscricións, rexistrando mesmo unha lista de agarda por se houbese cancelacións.
A Banda da Loba amenizou esta Noite Velada cunha completa actuación que durou, aproximadamente, unha hora e media. A agradable temperatura, a boa música e o ambiente levaron a que esta cita rexistrase todo un éxito de convocatoria e a que o público lle pedise varios bises á agrupación protagonista da cita, que cumpriu coa petición.
Dende o Concello de Boqueixón amósanse moi satisfeitos pola excelente resposta por parte da veciñanza a esta iniciativa. Ademais, agradecen que todas as persoas asistentes ó citado concerto cumprisen coas medidas de seguridade.