Muíños reitera que Santiago “é unha cidade moi segura”
O concelleiro de Seguridade Cidadá, Gonzalo Muíños, reuniuse con representantes da Asociación Raigame, na que estaba o presidente de Máis Veciños, así como o intendente da Policía Local e o comisario da Policía Nacional en Santiago. Unha xuntanza extensa na que se lle transmitiu que Santiago é unha cidade segura na que existe un traballo “de xeito coordinado” por parte da Policía Local e da Policía Nacional. Así mesmo, durante a xuntanza afirmouse que nos vindeiros días vaise incorporar a Policía Autonómica, cunha intensificación dos dispositivos e operativos que leven a cabo as distintas forzas e corpos de seguridade do Estado.
Na reunión, na que tamén participaron, segundo explicou Muíños, o intendente da Policía Local, o inspector da Policía Local que cubre a quenda da noite, o inspector da Polícia Nacional de Participación Cidadá, e o comisario da Policía Nacional en Santiago; púxose de manifesto que nos vindeiros días xa se ía percibir o incremento deses operativos especiais entre as policías local, autonómica e nacional; nun labor “totalmente” coordinado, que, aclarou, “xa se viña facendo desde hai tempo”, tal e “como reflicten os datos” que se lle amosaron á asociación.
Gonzalo Muíños destacou que os dous sucesos acontecidos a pasada semana, que se saldaron cunha persoa falecida e cun menor ferido; son illados, e que non se pode “estigmatizar a ningún colectivo” porque, engadiu, “o que buscamos entre todos é que Santiago siga sendo esa cidade segura, onde se pode desfrutrar, se pode pasear” e acudir “tranquilamente” aos lugares de ocio.
Unha afirmación que tamén comparte o alcalde Xosé Sánchez Bugallo quen, a preguntas dos xornalistas, incidiu en que “todos os datos indican que Santiago é unha cidade moi segura”, cun índice de criminalidade de 4 casos por cada dez anos, “afortunadamente todos resoltos”, “cunha secuencia que se ven mantendo bastante estable nos últimos trinta anos”. O rexedor insistiu en que se trata de dous feitos circunstanciais que coincidiron nun espazo e nun tempo próximo que non están conectados entre si; nos que se deu unha resposta “inmediata e eficaz”. Indicou tamén que “imos implementar unha actuación, dentro dos límites que marca a lei”, de carácter preventivo “e o máis eficiente posible”.