Recopilan os artigos xornalísticos máis enigmáticos de Cunqueiro

Mondoñedo. A Casa-Museo Álvaro Cunqueiro de Mondoñedo (Lugo) publica O labirinto do Imperio Secreto de Miguel González Somovilla, terceiro caderno da súa Colección Selva de Esmelle, iniciada o ano pasado por estas mesmas datas.

Este novo volume, impreso o 22 de decembro de 2020 para conmemorar o natalicio do grande escritor mindoniense (1911-1981), ofrece unha antoloxía de vinte artigos en castelán, publicados en distintos medios entre 1959 e 1976, todos eles procedentes dunha das series xornalísticas máis enigmáticas de Álvaro Cunqueiro. A través destes textos, o autor recrea unha sociedade imaxinaria, distópica, con cidadáns que habitan un suposto Imperio Secreto rexido por sucesivas dinastías de gobernantes.

A selección e a edición dos artigos reunidos neste libro, así como a introdución que precede aos textos cunqueirianos, estivo a cargo do xornalista Miguel González Somovilla que o elaborou durante os meses de pandemia tras unha suxestión de César Cunqueiro, para a Casa-Museo Álvaro Cunqueiro que coordina o profesor e crítico literario Armando Requeixo. ECG