Primeiras multas en Galicia por non levar posta a máscara

SANTIAGO DE COMPOSTELA, 20 (EP). Os axentes galegos interpuxeron xa esta fin de semana as primeiras multas en Galicia por incumprir a normativa da Xunta que estende a obrigatoriedade de usar a máscara en espazos pechados e abertos, mesmo aínda que poida manterse a distancia de seguridade.

A norma entrou en vigor ás 00,00 horas do domingo e desde primeiras horas incrementouse a vixilancia nas distintas urbes e zonas de lecer e producíronse as primeiras amoestacións e denuncias.

Os maiores problemas reflectíronse no lecer nocturno, como en Narón (A Coruña), onde durante a madrugada do domingo interpuxéronse unha ducia de sancións a persoas que se atopaban no exterior de locais sen levar máscara. Nas praias, con todo, o cumprimento foi a tónica maioritaria e, aínda que se deu aviso a persoas en areais de Pontevedra e A Coruña, ningún tivo obxección en porse a protección.

Aínda que distintos municipios destacaron que as incidencias foron poucas, noutras localidades se rexistraron un volume importante de amoestacións. É o caso de Sanxenxo, onde durante a fin de semana interpuxéronse 123 denuncias relacionadas co uso da máscara.

Segundo explicaron desde o consistorio, a maioría destes incumprimentos detectáronse durante a noite e madrugada --105 casos-- mentres que, durante o día, ascenderon a 18. Durante os últimos días, os axentes incrementaron os controis, cun traballo de información primeiro e de sanción despois.

Na fin de semana, os controis nocturnos realizados pola Policía Local de Sanxenxo en colaboración coa Garda Civil saldáronse cunha denuncia a un local de Portonovo tras interceptar no seu interior a 17 menores, oito deles consumindo alcol. Noutro local portonovés e unha terraza de Dorrón xestionáronse senllas sancións por non respectar o horario de peche.

DENUNCIAS EN FERROL, TUI OU LUGO

No caso de Ferrol, a Policía Local impuxo durante o domingo catro multas a viandantes que non levaban a perceptiva máscara e en Tui (Pontevedra), os axentes multaron a dous clientes dun establecemento hostaleiro que non cumprían tampouco con esta normativa.

Na cidade de Lugo, os policías sancionaron a 10 persoas que se atopaban sen máscaras nun local de lecer nocturno que, ademais, estaba aberto fóra da hora permitida e onde tamén se incautou unha arma branca a un dos clientes.

Por outra banda, na cidade das murallas tamén se multou a dúas persoas que paseaban pola zona monumental e a un terceiro veciño que se negou a porse máscara para acceder a un autobús interurbano.

Na comisaría de Viveiro, na mesma provincia, propúxose para sanción a dúas persoas que non utilizaban máscara pola rúa, aínda que os axentes destacaron que a maior parte das persoas advertidas por non usar este elemento "puxéronlla ao momento" e alegaron descoñecer que a normativa xa estaba en vigor.

VIGO, "INFLEXIBLE"

Na cidade de Vigo, a nova normativa trouxo 10 denuncias por non usar máscara, tres deles viandantes que, tras ser instados os axentes a pola, "reaccionaron con certa agresividade", segundo explicou o alcalde, Abel Caballero.

Ademais, interpúxose denuncia contra sete mozos que se atopaban participando nun torneo de rap "sen máscara, sen permisos e sen distancia de seguridade", e que tamén se negaron a porse este elemento de protección.

O rexedor vigués avanzou que nesta cidade respectarase de forma "rigorosa e taxativa" a obrigación de utilizar máscara, un elemento "imprescindible" para frear os contaxios. "Imos ser inflexibles", explicou.

A pesar desas sancións, de forma xenérica, Abel Caballero apuntou que os cidadáns están a cumprir de forma maioritaria a indicación e que, nalgúns casos, non levan máscara "por descoñecemento" da norma, aínda que existe o "desexo de cumprir".

RESPONSABILIDADE INDIVIDUAL

En contraposición, o alcalde de Santiago, Xosé Sánchez Bugallo, apelou este luns á "responsabilidade individual" para frear os contaxios e a "deixar de darlle voltas" ás multas. "O pensar que van ser as forzas de seguridade as que se ocupen do que facemos cada un de nós é imposible e inviable", indicou, ao ser preguntado por estas sancións.

Neste sentido, considerou que cada un se debe "concienciar" de que debe de saír á rúa con máscara, protexerse e manter as distancias de seguridade. "É un problema que compartimos toda a cidadanía e que todos somos corresponsables", manifestou.

Do mesmo xeito, apuntou que un establecemento de hostalaría debe esixir aos seus clientes que "actúen con responsabilidade". "Os que estamos a pensar que son as forzas de seguridade as que teñen capacidade de decidirnos a todos e a cada un dos 97.000 composteláns o que facemos ou deixamos de facer, é imposible", indicou.

Ademais, lembrou que, co levantamento do Estado de Alarma, el mesmo avisou de que "a carga pasaba a cada un" dos cidadáns. "Nas nosas casas, nas nosas familias", sinalou para mostrar a súa "indignación" por episodios como o vivido en Córdoba no que unha festa de gradación deixa a "centenares de persoas illadas e ducias de infectados". Na capital galega, os axentes da Policía Local acudiron o domingo á estación de autobuses a amoestar a dúas persoas que non levaban máscara.