Chavetas promocionará A Maía e Terras co GDR

A MAÍA. O GDR-19 Asociación Terras de Compostela aposta polo Sistema Integral de Calidade Turística en Destino para mellorar a experiencia e a satisfacción dos turistas que visitan un territorio. E, para acadalo, traballan sobre o propio lugar, os empresarios e os servizos, polo que van contar cun dos blogueiros máis recoñecidos actualmente en viaxes –Isaac Martin, do blog Chavetas– para promocionar os dez municipios do GDR, incluíndo os dous da Maía.

Así, e ata o xoves, Martín, Paula Bello e a súa filla Oli van visitar Boqueixón, Teo, Vedra, Brión, Ames, Negreira, A Baña, Dubra e Santa Comba para descubrirlle aos seus 20.000 seguidores de Instagram e 50.000 de Facebook os principais lugares de interese. Ademais da promoción nas súas redes sociais, contarano na web chavetas.es. A actividade completarase o vindeiro día 21 no Pazo de Vista Alegre de Vedra ca entrega de recoñecementos a vinte dos profesionais do Sicted. m. m.