Conferencias, desfile de moda e música nas xornadas sobre o liño nas Torres do Allo
As Torres do Allo (Zas) acollen este sábado, día 23, a Xornada sobre o liño. Economía Circular, unha actividade aberta a toda a veciñanza. Comezará ás 19.00 horas cunha demostración en vivo sobre os diferentes procesos de elaboración do liño.
O liño e o seu papel dentro da economía circular será o tema sobre o que xiren as diferentes conferencias, a partir das 19.30 horas, que estarán presentadas pola xornalista Mónica Martínez. A primeira en falar será Rosa Sánchez e farao sobre Liño: artesanía, identidade e economía circular. Continuará Jorge Mira Pérez cun relatorio que leva por título O futuro na volta ás orixes.
Ricardo García Mira, experto en Psicoloxía Social, disertará sobre O liño na Costa da Morte como elemento decohesión social e cultural e rematará Xosé Regueira, vicepresidente da Deputación da Coruña, co relatorio O liño tradicionalmente contemporáneo.
Unha vez rematadas as conferencias, haberá un desfile de moda con pezas de roupa elaboradas de forma artesanal con liño e, a continuación, Antía Muíño ofrecerá un breve concerto de música. As xornadas rematarán cunha degustación de produtos relacionados coa fía do liño e tamén se realizará un sorteo entre os asistentes.
Esta é unha actividade organizada polo Concello de Zas en colaboración coa Asociación Amigos do Liño á que poden asistir de forma gratuíta todas as persoas que o desexen. Unicamente será necesaria a inscrición previa que se pode realizar a través do 981 718 056 (Centro Sociocultural de Baio) ou no 981 751 398 (Centro Sociocultural de Zas) en horario de luns a venres de 09.00 a 14.00 horas.