Corcubión queda sen as palmeiras da céntrica praza de Castelao
Foron retiradas por estar afectadas pola praga do picudo vermello
A praza de Castelao, de Corcubión, perdeu un dos seus atractivos: as palmeiras, que este martes foron cortadas, debido a que estas árbores, ao igual que outras da mesma especie ubicadas noutros puntos da vila, están afectadas pola praga do picudo vermello.
O portavoz de Sempre Corcubión, Alfredo González, lamenta este final para “máis de 60 anos de historia destes exemplares, que eran un sinal de identidade da vila corcubionesa”. Lembra que o seu grupo “xa advertira con tempo deste problema” e entende que non foi posible salvalas pola “deixadez, ineficacia ou mala sorte”. Pide agora que se deseñe un plan para recuperar “a vistosidade dunha praza marabillosa, agora despoboada”.