Estudarán o amarre da frota en contra da nova normativa europea

Malpica. Os patróns maiores das confrarías de pescadores de Galicia reuniranse este sábado de xeito telemático para consensuar accións de protesta en contra da nova normativa europea que obriga a equipar todas as embarcacións de entre 4 e 12 metros con sistema de xeolocalización e cámaras, ademais de ter que rexistrar dixitalmente os datos de capturas e envialos con dúas horas de antelación á entrada en porto, segundo explicou o patrón de Malpica, Pedro Pérez.

A referida lexislación xa está en vigor “e foi aprobada sen falar coa xente do mar”, engadiu. Entre as propostas que barallan é “un día de amarre de toda a frota” en sinal de protesta en contra dun sistema que ven inviable neste tipo de embarcacións, “e que tampouco está a funcionar nos barcos grandes”, afirma.

Segundo Pedro Pérez “a maioría das embarcacións dende que acaban de pescar terían que esperar no mar a que pasasen dúas horas para entrar a porto, e facer un traballo de oficina durante media hora, algo que é inviable, e máis en barcos pequenos que nin ponte teñen”. Ademais, a normativa obriga a notificar os quilos capturados de cada especie “cun marxe de erro mínimo, polo que xa están multando a barcos por pasarse en 2 o 3 kg”.

Dende o sector aseguran que aínda que esta nova normativa se xustifica en aras de reforzar a seguridade da frota, "a verdadeira fin é ter controlados en todo momento ás embarcacións".