Ferido un motorista que caeu na praia dos Muíños, en Muxía

Un motorista resultou ferido ao caer na praia dos Muíños, en Muxía, polo que tivo que ser trasladado en ambulancia ao Hospital Virxe da Xunqueira, de Cee. O 112 Galicia recibía ás 9.45 horas a chamada dun particular que alertaba da caída do motorista. Aínda que estaba consciente, o accidentado necesitaba da asistencia dos servizos sanitarios, pois resultara ferido ao golpearse coa area tras caer da moto.

O Centro Integrado de Atención ás Emerxencias mobilizou ao persoal de Urxencias Sanitarias de Galicia-061, que se desprazou a bordo dunha ambulancia ata o areal muxián, onde ofreceron atención médica ao ferido. Finalmente, dende a Policía Local de Muxía comunicaron que o paciente foi trasladado ao centro hospitalario de referencia. Acudiron tamén voluntarios de Protección Civil da localidade para colaborar no operativo.