Gran final da Olimpíada Cultural no IES Fernando Blanco ceense
Cee. A gran final da XI Olimpíada Cultural O Saber ten Premio, do IES Fernando Blanco de Cee, gañouna o equipo FCAC, integrado por Marco Antonio Esteban Norat, Viviana Ramírez Silva, Eva Senra Fafián, Lucía Canosa Lestón e Enrique Castro Conde. Recibiron o seu premio (seiscentos euros) de mans de Justo Trillo Lado, representante de Xeal.
O segundo premio (400 €) foi para o equipo Os Murciélagos, formado por Sergio Castro Romar, Isabel Díaz Jallas, Ariadna Mar Castro Arasme, Elisabet Insua Ostaseviciene e Brais Canosa Lestón. Entregoulles o galardón Mélani Lois Barcia, representante de Gerca. E o terceiro (300 €) foi para Os Terceiros, un equipo composto por José Denis Reyes, Diego Estévez Canosa, Paula Pérez Espasandín, Alejandro Ferreiro Somoza e Juan Francisco Díaz Suárez. Fíxolles entrega deste galardón Severo Roget, da Ferretería Roget.
Á gala, que foi conducida polo xornalista corcubionés Fran Hermida, asistiron as familias, o profesorado e os patrocinadores que fan posible esta olimpíada, así como o subdirector xeral de Ordenación, Inspección e Avaliación do Sistema Educativo, Iván Mira Fernández.
A gran final constou de dúas partes. Na primeira tiveron que contestar a vinte preguntas extraídas ao chou entre máis de 1.000 propostas. E a segunda consistiu nun debate sobre a nova Lei de Protección Animal, que ten en consideración aos animais domésticos como membros da familia. M. Lavandeira