A Pobra acolle un curso sobre iniciación á gandería de ovino-cabrún

A Pobra. A Consellería do Medio Rural, a través da Axencia Galega da Calidade Alimentaria (Agacal), ten previsto organizar un curso sobre iniciación e mellora da gandería de ovino-cabrún na Pobra. Desenvolverase dende o vindeiro luns 11 ata o sábado 16 no auditorio do Museo Valle-Inclán, de 09.00 a 14.00 horas.

Esta iniciativa está dirixida a calquera persoa vinculada profesionalmente ou con expectativa de incorporación aos sectores produtivos relacionados coa agricultura, a gandería, a industria agroalimentaria e a cadea forestal-madeira, así como aos mozos e mozas do rural galego interesados neste eido.

Ao longo das 25 horas, o curso afondará en diversos temas, como a situación actual do sector, a alimentación destes rumiantes e os seus requirimentos, así como o manexo e implantación de pradeiras ou as axudas ás que poden acceder os gandeiros.

Ademais, a acción formativa tamén contará cunha visita a unha gandería da zona para a posta en práctica dos coñecementos adquiridos.

PLAN INDIVIDUALIZADO. Deste xeito, o obxectivo principal do curso é incrementar o nivel de profesionalización do sector ovino-cabrún galego. Para iso, os docentes analizarán as carencias dos titulares e potenciais titulares deste tipo de explotacións gandeiras que asistan á formación, elaborando un plan de mellora individual.

Os interesados en participar poden solicitar máis información chamando ó número 981 546 689. s. souto