Foro de mulleres emprendedoras da Costa da Morte na Fundación Eduardo Pondal

A sede da Fundación Eduardo Pondal, de Ponteceso, acolleu o Foro de mulleres emprendedoras da Costa da Morte, un evento promovido pola Consellería de Promoción do Emprego e Igualdade para poñer en valor a contribución destas traballadoras ao desenvolvemento produtivo da contorna.

A actividade, impulsada desde o Polo de emprendemento e apoio ao emprego Costa da Morte situado en Coristanco, deu a coñecer a experiencia de cinco emprendedoras desta zona que debateron acerca das oportunidades de iniciar un negocio nas contornas rurais. No encontro participaron Pilar Trillo, promotora dun proxecto de turismo rural en Muxía; Begoña Fernández da galería Stoupa, de Cee; Patricia Vaquero, da consultora Nós igualdade; Silvina Muñoz, de repostería creativa Algareira; e Cristina Vázquez de Horta do Noroeste.

O evento incluíu un espazo de exposición para que as mulleres emprendedoras amosasen os seus produtos e proxectos.